Misan minukyat ku king eran a matas
para agtalan ko detang mansanitas,
king tauling balitang bayu ku pa miras
o’bat karin ku pa ikwang mitaluras?
Bala-balaus kung mebaldug king lalam
pablasang e ku na ikwang mekatalan;
neng migkulang bagya ining kaingatan
digsu naku rugu mengapakli tagyang
Uli ning dimdam kung e bibirung sakit
king panganabu ku a mumuna buldit;
gewa kung paralan ban e na maulit
ing kaku milyari, ginawa kung sungkit
Dapot ding matiro eku la ayabut
uli ning sungkit ku a mibabayutuk,
inia pati retang e pa man malulut
alulugus kula king karelang tampuk
Inia pasibayu malale kung menik
king disan kung eran a karin ku kebit,
balang itakbang ko ding kanakung bitis
makaantabe ing talan kung matigik
Ikwa kong agisan ding bungang malulut
a ketang sungkit ku eku man ayabut
at kanita ku pa mu lubus atalus,
ala kung asapat nung e ku melaus
Ustung mengarap ka king maluka mung bie
ing determinasyun kailangan yang tune;
nung ketang primeru eka menagumpe
e dapat sumuku king banal mung pake…
Vhelle V. Garcia
November 25, 2012
Abu Dhabi, United Arab Emirates
