1.
Alang permanenti, keti babo yatu
ing nanu mang bage, e tamu apihu
maging ding pamalak, king isip ding tau
king nanu mang oras, ating pamagbayu
2
Mengari mu namang, biga king alapap
paalialiwa, la alkus at bikas
Pelalung ing tiup ning, angin a banayad
kabud na sisikan, bibyung a mataras
3.
Magbayu la naman, maging ding disisyun
kalabas namu ning, mapilan panaun
nung atupan la ring, tamak a sulusyun
king ikasaplala, ning mayap a layun
4
Ding kapamalakang, maluat nang mitakdâ
king e ta asahan, magbayu lang biglâ
pangaku la man den, o daliseng sumpâ
ing katuparan da, e ta abitasâ
5.
Misan ding tagimpan, e la matutupad
e uling migbayu, la retang pamalak
ing metung a sangkan, a e ta akawat
uli ring pangaku, a e misasadsad
6.
Ing naturalesa, alus kakabas de
ring pigampa tamu, king kekatamung bie
masangil neng misan, at malugmang tune
ing kalmang daratang, nung pakasurian ye
7.
E ta manalig at, manwala na kabud
king pisulung sumpa, na ning pamanirug
magbayu ing sabla, agiang nu katutus
ing tagle nang timyas ning pamikalugud
8.
Nung atin mang bageng, e binang magbayu
ing kule ning banua at durut ning yatu
ampo ing lugud ning makamal a Guinu
a mengabus karing kasalanan tamu…
