I
Iniang kagli ya ing asawa nang Simu
memita yang manuk a kule malutu
neng alang panyali ing depat na rugu
menako yang lasak ita pang manutu
II
Agad yang minuli king karelang bale
pebukal yang danum kayari neng pete
dapot iniang iti bubulbulan na ne
dekap de ring pulis uling ayaktu re
III
Ita palang manuk a kayang atupan
bandi ne ning meyor king karelang lugal
nung inia I Simu agad neng pekiduang
ban akilala ne ing ginawang mulang
IV
Pablasang ing meyor mamakla-makla ya
inia ring masanting ila ring kapad na
at uling I Simu tiktak ya katsura
paten ne lasa king ibye ng parusa
V
Inaus neng meyor metung nang galame
saka ne pepakwa ing manuk a mete
“samalan mu ngana iti I derang me”,
“kaibat magbalik ka ustung melutu ne”
VI
Kalutu ning manuk epag de lamesa
kang Simu atin lang bage inisplika
nung nanu ng gawan mu king manuk ngara
makanian mu naman ing gawan mi keka
VII
Alimbawa ngara pemakli me pakpak
paklian mi la naman ding adwa mung gamat
ustung ding bitis na ring kekang piglapak
paglapakan mi la naman ding kekang puad
VIII
Dapot ustung ika ngana ning alkaldi
atin kang agawang ikami ali mi
keka ne ing manuk iuli me iti
para king abe mung memita kaniti
IX
Minisip ya’y Simung masanting nang gawan
king ban ing parusa kayang akabyusan
ot kabira-bira gulping mipatiman
ketang aisip na king manuk a derang
X
Malale neng binwat at pidurut-durut
a gewa ra naman kaya retang tanud
at kaibat sigpang ne ing buldit ning manuk
saka ne sibsab at pinyipsip paldeut
XI
Ela mipabulad ; mipamulala la
ing mayor pati na ring abe nang guwardiya
neng alang mebisang gawa king depat na
binye da ne’ing manuk; dinian de pang pera …..
