Baket kasaspak mung salu ing tagumpe
Ning para mung taung lalagu pagkabie?
At anti mu waring maybug pakipate
Potang damdaman mung iti pupuryan de?
Baket anti ka mo waring lalasunan
Potang yang paksa ning nanu mang kayapan?
Nanan mu keta ing ating salangsang
Ban ing kaplas a mirian kapaldanan.
Misan nanan mu’na ing mitakid ya sa’
King ba’yang misakab king bie nang payapa,
Uli ning bina mu waring katutula
Ing akit meng bigu keti king masala.
Ala kang akakit nung e mali na
A keta agad mung king dalan titinda,
Pero nung kapuryan sa’ ing agawa na
Angga mu pin ketang sasalikut mu pa!
Yan, king kapilan man e sukat mamale
King pilubluban ning maka-Dios a tune,
Uling mentras maka-kayap king keang bie,
Mekad mu – king marok karin ne atake.
Pablasang nung misan e bala namu ping
King kaparang tau nasang e masanting
Maralas king bie na kabaligtaran ing
Dagpa king taung e patas manalangin.
Kase, ing Ginung Dios e ya kunsintirul
At e makakua keng ain singkaragul;
Inya nung king bili nang Pedro ka saul,
E me pamarius ban manabu keng kulkul!
Nune’y pangadi mung masensu ya sana,
Ban agyang barya mu augsyanan na ka,
Kesa bagyang kabit pane nang matsura
Ing panalangin a patungkul mu kaya.
Obat imbes iting malagung larawan
Ning bie ning kaparang tau ing isipan
A nung makananung agawang sandalan,
Kesa’y pangadi mung misakab ya’sa yan?
King uli na mu ning kariryan me bili
Pamarius meng ya’sa malipit ya, mali;
Alang taung keka tumula, sakali
Ating makakit a e mu kaugali.
Ing dirya, e sukat mamale king pusu
Ning ninu man uling makaskup mung salu
Ing anti yan at nu’ imbes mie malagu
At payapang bili, yan babayat lalu!
