INYANG mirate ya keng dase i Tasyu
Angga king bayu ya rugu mag-ingalu,
Metung mung bage ing buri nang abalu
King keyang asawang e kinupas lagu.
Iti maluat na nang pagnasan ikutang
Oneng angga mu king pane mapapakdal;
At ngeni nia mu pin mesikan a lub yan
Ban king esposa na ibuklat itinan.
Ya’ytang obat karing apulung anak da,
Ing bungsu ya kabud ing tiktak katsura;
Kabang ding siyam pogi at mangalagu la,
Inia anti keni ing pakibaluan na:
At iti nung kenu ne kanu pengagli,
Ing bungsung anak dang kabuntuk at piki;
Kabang mangalagu la pin ampon pogi
Ding kapatad niti a mituki-tuki.
Banayad lepitan neng Miniang king papag
I Tasyu antining ta’ne asdak-asdak,
Mangisnawa ampon maybug nang mapatad
A inawa kabang aplit yang sesenyas.
“Ing kutang antining ibat na rin keka,
E mu sa’ ikamua pakibatan ku na;
Dening siyam, ing tutu – mialiwa la tata,
Ing bungsu ya kabud ing talagang keka…”
(AY RUGU, balamu pagmaragul na pa
Ning misis nang Tasyu ing mekarakal ya,
At e mikakunung arapan sabian na
Ing siyam deting anak mialiwa la tata.
O, dipa ning mayap. nung agawa na pa
Mekad ning Tasyu ing mamaldak asawa,
Nu’man anti tibe ing dalig mibual ya
Nung pagpilitan neng paldakan ning tata.
A’yanti mo pin keng kalulu nang bili
Ning Tasyu, menyese ibat king malati
La ring siglap na ning asawang makudi,
A nu’ siyam e no’ pala ren palipi.
Oyan, imbes kasi ing e na abalu
Ing metorot ya ya rugu ining Tasyu,
Antining malapit neng mamagkad rugu
Ot sinabi na pa ning Miniang ing tutu?
King metung a banda obat naman ining
Malapit nang mate aganaka niting
Kitang ing e sukat na pang dinan pansin
Anti na ning iti palako nia murin?
Inia ika kuyug potang ati’ tana
King bie ali tane atulak ing kama,
E tana kukutang kenu man karela
Nung bakit ing bungsu ya kekang kalupa!
Male mu nung ika ing bukul sasarul,
Tatanam king lauta a mialiwang butul;
Pakwan ya ing bini, memunga yang milun,
Asahan mung ating aliwang sinakul!
Pakapangilagan ing nung sasakul ka
E mu gagawan king e sariling lauta;
Uli na ning pihu ka mung madisgrasya
Kabud ing serul mu e ya pala keka!
