NUNG bisa kang maging popular a tau
At kagalang-galang karing kabalen mu,
Subukan mu misan ing kumandidatu
Para mayor banting iti asubuk mu.
Sakali sumambut, pakapangilagan
Ing keka ala lang abusbus nanu man,
King bie pulitiku daratang nung misan
Itang nanu mu ken maging kapintasan.
Nung likas man keka ing e mapanatu
Iti, pagsikapan mung ganap arayu,
Ban e ra asabing alkalde ka pamu
Kasebyan makatwa, matas na ka tungku.
Ipakit mung ika, e ka benggatibu
Karing kenu pa mang e mu kapartidu,
Ban e ra mu naman asabi ring tau
E ka pala dapat maging pulitiku.
E uling balu mung aku, alimbawa
E ra ka binotu emu’y sukat kamwa,
Nu’ne ipakit mung sumangid ning sabla,
Pamangilala e mebawas bitasa.
Ing bie pulitiku makanyan talaga,
Nanu mu papaskil da keng ‘social media,’
Inyasa’t nung balat-sibuyas ka lupa
Dakal itang iti, kasusora mu’yta.
Agyang katambak ka bibit a salapi,
At nanu man agad mung akwang asali,
Angga’t abata mu, e ka pa sasali
Uling keng indredus yan asna king katni.
Nanu mu, agad dang papaskil keng ‘google,’
‘Like you bought a new car,’ pisabyan da na ken;
Inya ala na kang asalikut karen,
Lalu pa’t ing inggil king isyung pambalen.
Inya agyu ta’ mang sali agyang nanu,
Yutaba ta’na pa nung akung kutnan yu,
Uling e malaut isipan ding tau,
Dakal ta’na mekad akupit siguru?
Ing pamanungkulan, e na kasing kayan
Ning keng negosyanti nung banayad sukdan;
Ing keng pulitika malaguang atulan
Ding masala mata keng bage kasiran.
Bilang matapat at tune ‘public servant’
E ka’ paytake king nanu mang aligwat
Ning tuksung kakambal ning bage e mayap
At ning e malagung kapanayan bukas.
E tamu makiapus karing aliwan ken
A’yalang masabal king karelang balen
A’yanti mo retang kalukluk da pa ren
Mialiwa na bau ing indredus karen.
At nung ngeni pamu panaratus ta’ ne
Ing kaban ning balen, yan e ustu, Abe;
Tipunan pa dapat itang bage-bage
A sukat isikap o kaya ilele.
Malagwa at alang sulit ing manutang
Lalu pa’t pambalen a pamangailangan,
Pero, sana pakibalak tamu naman
Nung keng pamamayad e ta’ kabayatnan.
Ing bugasuk ampon dapal keng balu ku,
Masuksuk ya asna kalalam pin kanu;
Inya nanu’t para mamalagwa tamu
King nanu mang bage e pa siguradu?
E ka’ mamiraal king nanu mang balak
A malyaring buri mu nang patalakad,
Yan saka na potang atin ta’nang sapat
A pera karin ta’ saup-saup gunyat!
