CANITANG aplit cung manasic, darangle
Dili-dili cu mu carin king marangle;
Acu mung sinarul, solu cung minaswe
At acung memunla king tenam cung pale.
Acung miglagumba, migpasacang danum
King pale tenam cung manayang paranum;
Acu murin itang king abonung gabun
Kinalap, ban keta sumanting cu pupul.
Acung patingapun king pale sisiasat
At king aliwa pang cailagan king dayat;
Pati pamangan na ning cacung damulag
Acu murin keta ing maintun, magdulap.
King eganaganang atiu king taldawa
Acu pa murin ing lilingun, gagawa;
Alang ninu pa man ing sinaup mo sa’
Angga na king metua ing pale cung mura.
Obat ngening iti dapat nang mapalut
Dacal la ring cacu makisaup-saup?
At nung nanu-nanu ing carelang yaluc
Uli ning balu rang atin no’ng asaluc.
Pagdala ra ca mang mialiwang capangan,
King camal na niti e mu maybug cuanan;
Ulining balamu presyung tacalanan
Itang lalacu rang yatad king dayatan.
Balu ra ca potang adidinan mu la
Ding keraclan caring durulung, pupunta;
At karen malamang dandam cang matsura
Potang ating e mu adinan carela.
Tabalu nung bakit meging panugali
Ding aliwang tau ing e ustung gawi;
Ing Ortelaun ken nu’ya magcabili?
O ngeni mong dacal, pamie na’na wari?
Ing acakit da ren pawang pakinabang
At e ra lalon ing keyang capagalan;
Sasarul ya pamu migagastus ne yan
Angga na king iti panupan nang tanam.
Balu ria mung puntan a pibale-bale
Ngening ding aliwa balu reng mapale;
Dapot ‘niang aplit yang sasarul, mamaswe
Labas-labasan dia carin king marangle!
Dacal itang e ra balu ring keraclan
King bie Ortelanu, keyang casakitan;
Carin a nung nu’ ne niti lacuan, dasan
Ning pali ning aldo at dimla ning uran.
Map a map micalma yang minupul sapat
At e ya mirasan king albug o malat;
Canita ya mica-sobrang ditac-ditac
At king autang na medyu macabawas;
O nung mipaintagun mica-calamidad
At ing keyang tenam gisan da ring ulad,
Mecad mu metung man alang cusang mampiad
King santungan niti ban sacoruan agad.
Iti ing menasa a maging calbariu
Ding anti na waring tinoca ning Ginu,
Keng lauta, ban keta iting bida tamu
Ya ing gunyat, palto pamangan ding tau.
(Inia nung keti king yatung pagkarinan
Alang Ortelanu o mabandi la ngan
Ding sabla, ninu ing kimut mananaman
Ban e ta’ mangaskad keng danup ita’ngan?)
