1.
Kanitang anak ku neng ating sasarul
agad kung takiki magmatyag king danum
ustung mikawani ing dikut king gabun
manakit kang asan, tugak, alipaktung
2
magdala kung swiki a kakung lulanan
karing atima kung m’yayaliwang asan
atin kung aparting boting datukanan
karetang kamarung kakung pandamputan
3.
At nung tugak no man pamaklian ko bitis
ban mabulus la man ena la misulpit
king kanakung suput karin ko kakabit
saka ke punggungang misna king katigik
4
Kapitna mung oras ta’ naka miuli
atin nakang asan a kekang apaksi
deta namang tugak a medyu malati
karing mamatukba kula pamisali
5.
At ustung panahun na ning pamamalut
dakal lang akit mung king pale mamulut
itang mitagan a likwan ding papalut
misasamsaman keng kaniti manakdut
6
Mapilan mung aldo ing pale mepupul
ibatbat da na at lugusan king impun
barug-barug kamu akwa meng atipun
ing kapitnang kaban king kekang pandulung
7.
Ing bie king marangle nanan ke mang suryan
tutu yang makule at pangngawilyan
masipag ka sana atangka mung myuman
king misan a aldo kanan yung pabulan
8.
Uling king taldawa bukud karing pale
malyari kang tanam pakwan ampon gule
balasenas, okra, balatung at bule
kulbasa, apalya’t, opung kukulate
9.
Malyari ka namang manyese animal
baka, manuk, kambing king kekang mulahan
pablasang malawak ing kekang pastulan
e binang problema dikut dang apangan
10.
Uling matanaman karetang tarundun
e binang masulit panangab mung dutung
atin kang talagang malinis a danum
a kekang panunyab king abias mung i tun
11
Kapakbung ning aldo karin king aslagan
deting ortelano ati no asikan
ating mamaranum, manulip king tanam
manggamas, at saka detang mamalampang
12.
Ding aliwa naman atyu la king sapa
sisilo lang kitig pakasake bangka
ating manyalapang ampon manalangka
at ating maglimas karetang talaga
13.
Pangkaraniwan a almusal neng abak
nasing milagrosa at gatas damulag
singleng miki-bawang ampon derang dalag
ing kekang titltilan aslam yang maparas
14.
At potang ume neng dalumdum ing banwa
dapugan muna ing mitipun a sanga
penandit ding ayup damdaman mu nala
sisyap at sisiksik babo ding tiropa
15.
Makanian kasimpli ing bie king taldawa
ala kang ligalig king pusu at diwa
malinis ing angin a tityup payapa
a anti mo waring keka magtumayla
16.
Inia ding aliwa kaku lang pagtakan
bakit pisali da gabun dang asikan?
ing bie king marangle karelang gilutan
king magulung syudad mekisapalaran….
