Kanitang anak ku, neng ating sasarul
Agad kung tataki magmatyag keng danum;
Ustung mikawani ing dikut king gabun
Manakit kung asan, tugak ampon durun.
Magdala kung swiki a kakung lulanan
Karing atima kung miayaliwang asan;
Atin kung aparting boting datukanan
Karing kamaru a kakung pandamputan.
At nung tugak no’ man pamaklian ko’ bitis
Ban mabulus la man e la makasulpit;
King kanakung suput karin ko’ kakabit
Saka ke’ punggungan a mipnu katigik.
Kapitna mung oras ta’na ka miuli
Atin na kang asan a kekang apaksi
At ding tugak naman a medyu malati
Karing mamatukba ku la pamisali.
At potang panahun na ning pamamalut
Dakal lang akit mung king pale papalut;
Itang mitagan a likwan ding papalut
Misasamsaman keng kaniti manakdut.
Mapilan mung aldo ing pale mepupul,
Ibatbat da iti’t lugusan king impun;
Barug-bargu ka mu akwa meng atipun
Ing kapitnang kaban king kekang pandulung.
Ing bie keng marangle nanan ku mang suryan
Bina yang makule at pangangawilyan;
Masipag ka sana atangka mung myuman
King misan a aldo kanan mung pabulan.
Uling keng taldawa bukud kanyang pale
Malyari kang tanam pakwan ampon gule;
Balasenas, okra, balatung at bule
Kulbasa, apalya, opung kukulate.
Malyari ka namang manyese animal
Baka, manuk, kambing king kekang mulahan,
Pablasang malawak ing kekang pastulan
E binang problema dikut dang apangan.
Uling matanaman kareting tarundun
E binang masulit panangab mung dutung;
Atin kang talagang malinis a danum
A kekang panunyab king abias mung itun.
Kasapwak ning aldo karin king aslagan
Deting ortelanu ati no’ asikan;
Ating mamaranum, manulip king tanam,
Manggamas, at saka detang mamalampang.
Ding aliwa naman atilu king sapa
Sisilo lang kitig, pakasake Bangka;
Ating manyalapang ampon manalangka
At ating maglimas karetang talaga.
Pangkaraniwan a almusal neng abak
Nasing milagrosa at gatas damulag,
Single maki-bawang ampon derang dalag,
Ing kekang tiltilan aslam a maparas.
At potang ume neng dalumdum ing banwa
Dapugan mu na ing mitipun a sanga;
Penandit ding ayup damdaman mu na la
Sisyap at sisiksik babo da ring tropa.
Makanyan kasimple ing bie king taldawa
Ala kang tigatig king pusu at diwa;
Malinis ing angin a tityup payapa,
A anti mo waring keka magtumayla!
Vhelle V. Garcia
Abu Dhabi, United Arab Emirates
Feb. 4, 2012
