King keraklan da ring kanakung kumpari,
I pare kung Tomas panodus keng dili;
At yan e uli ning kasundu keng pilmi
Nune king bisyu na a pamagbabai.
Ya, ing katutuan na e ne man masanting
Pero migit keta, bolero yamu pin;
Yang babai agyang mikit la pa nandin,
Penandit mu akua na neng apaniantsing.
Mupin, ing e ku mu kapupuri keya
Iti e mamili mang papatulan na;
Madalas pelalu tiktak a katsura,
E ne pikarine agyang kaninu pa.
Ing metung a bage e ku katutula,
Pati talasawa e na panupaya;
King sobrang ilig na makatiltil ya sa’
E na pikabyang man agyang ating mimua.
Tabalu nung baket pibuburyan de yan
King agyang lupa yang hitung alang asang;
At lalung ala yang kualtang ipanapan
Uling mamilang yang posti kareng dalan.
Tuberu ya mu’yti at binang malagad
King keyang opisyu makakua yang tanggap;
Pero keng galing na pamirapat-dapat
Milalabas ya keng bisyu nang e mayap.
Misan a memasyal ya kang kumpari na
Ing keyang kumari ya kabud disan na;
Sukat mung e meluat itang kwentuan da,
Ikua na ne mayna kumari nang Sepa?
Ing babai pala a tutung mahilig
Malagua yang makua keng pakalbit-kalbit;
Inya ing milyari, ikua neng araig
Keng patampa-tampa at patapik-tapik.
Kabud-abud namu menabat lang saken
At pepatad la king mismung plazang balen;
Karas da…pasimpling miagnan lang linub den
King e naman sikat at mura mung otel.
Inyang atinalu king pasilyu mismu
At ume no’ sanang lungub pin king kuartu,
Bigla iting Tomas meputla yang ustu
Lipat ne pa keta ing mekakit multu!
Dimdam nang sinapo ing matinding nerbius
King atangalan na makapangalo ‘tud;
Keng pangatikdo na antia’mong tinulus,
Nung arapat namu akua na sang’ lumbug.
Obat e pin naman mangalgal a laman
King bage ikit na o karin asaksyan?
Ing keyang asawa’t kumpari nang Teban
King mesabing otel atilu mu naman!
Ing metung pang sisti king bage merapat
Deting mikumpari buluk da metuklas;
E na rugu balu ning kalulung Tomas
Ing maluat ne palang king utang na bayad.
Isipan na kasing parati kanita,
Ing alang ninu mang makalamang keya;
E na ukulan pin datang, miras keta
Ing ya mamuntuk ya namang urinola.
Nung king bage agyang kaninu, masakit
Itang king asawa ating makasingit;
Pero keng puntung yan a keta meyakit,
Ninu king tantia yu ing mas menasakit?
Inya siguru ken ban alang lamangan,
Ing bage e keka e me pakialaman;
Ing keti king yatu dapat tang’ ganakan,
Ing Alti ya kabud alang kayablasan!!!
