KANITANG ing bansa dilpak de at sekal
ding Hapones karing gamat deting bakal,
karin king Bataan a nu’la mipalpal
king aldo at bengi rang pamakipagkal
ding kang Sam ampo ring kekatamung kawal;
King uli ning puyat, danup ampon pagal,
e meluat ikua na ka’tamung asakmal
ning Hapon, pati ing kalaban nang mortal.
A’yala’t aliwa nune’ing Amerika,
a makabase ken king bansa kanita,
nung nu’ uling migit la sikan a puersa
deting sinalake a katunggali na,
kilub ning alus ala pa mang pabanua,
ding Hapones ilang migwagi king gyera;
At itamu itang mitangab king mua ra
ding Hapon a’yalang pusu at konsensya.
At detang mitagan a likua’na keti
ning kanita Heneral a masasabi,
a makibat king lagyung McArthur pati,
karin king aliwang bansa ya kampanti,
kabang i Abad Santos, (a bayaning sugi)
yang dekap da’t buring pilitan ban iti,
Sumpa lalam na ning bandera da reti
bilang ‘puppet,’ dapot e mebisa iti.
Angga na king pete re ping alang laban
i Don Jose e ya migbayu dit’mu man;
at uling lipi yang tune Kapampangan
a ngara pin ating likas a tepangan,
angga na king tauling pilit deng pasumpan
lalam dang Bandila ring mapanalipan,
ing kang Pepito na matatag gingkas n’yan:
“Ipakit mu karen, matapang ka naman!”
At n’yang misaldak neng lubus king Bataan
ing puersa ding kawal tamu at ding kang Sam;
bista’t sinuku la reti king labanan
kambe ning Bandila tamu at ing kang Sam,
imbes ituring da’lang ‘prisoner of war,’
ding kusang sinuku at e na lalaban,
King ditak a e ra buri deting Sakang –
itomba ra niamu ing e na mitakbang
Karing alang lunus pepalakaran den
manibat Bataan anggang istasyun tren
ning MMR ken king peka-sentrung balen
ning Pampanga, inya ding aliwa karen
ken pang kaminu a karelang babaslen,
papunta king (ngeni asensadung balen
na ning San Fernando) katlung dake ra ren
mekad mu, gisan da la lang pemate ken.
Partikular detang e na migulape,
sobra kayna uli ning sakit dang tagle;
uling ba’lang mibual, imbes itikdo re
bayoneta ya ing king tau pamate
alang pangimi man ding alang marine
Hapones a keti king bansa ta’ mine
at migpasasa king balayan ta’ng tune
kabang ding memalen ilang alang dake.
Pablasang simsam da ing egana-gana
a sukat pagkabie ding balang disan da,
puera pa king puri ding anak nang Eba
a gewa rang ‘comfort women’ pin kanita;
At nung angga ngeni ding ken king Candaba,
a lesak da dangal at bukas king bie ra,
angga king mete la keng kapapanaya,
e mirinan pansin ing kayaduanan da.
At maging ding dakal a mibual Bataan
ampon aliwa pang mete king labanan,
ila ring kapurit mang ‘back pay’ dang ausan
ilang e misuerting tinanggap, midinan;
kabang ding e biasa mang king armas talan,
ila retang memag-pension bulan-bulan;
(O ing gubyernu yang ating kakulangan
inia mangibabo ing antimo kanian?!)
