(Kaugne ning pamagmasusi king ‘Flag Day’ a merapat king Heroes Hall ning Siyudad San Fernando, a penimunan nang Mayor Edwin ‘EDSA’ D. Santiago, iting poesiang sinulat ning maluka yung talasuyu inggil king mesabing okasyun ya pamung ibie mi para king malugud yung pamamasa)
ITI e ya kabud kapirasong tela
A pidait-dait banting mibubu ya
Ing tatangalan ta’ng makule bandera
A replica na ning tehi ra kanita
Karin king Hongkong ding atlung Filipina;
At nu’ iti ya ing meging simbulu na
Ning lipi, at deting maslag a kule na
Ila ring malino sasagisag keta,
Karing kapuryan at tagle talindo ra
Ding memalen at ning balen tamung sinta!
Ing asul, simbulu ne ning kapayapan,
Katalarwan ampon dalise katutwan;
Kabang ing malutu, sibul ning tepangan
Ampo pakamal king balayan a tibwan;
Ing maputi, alang musing a sisimpan
O ing papalkas na niti kalinisan;
At ding atlung batwin ilang kakatawan,
Karing atlung isla mabilug kapulwan;
Ding walu nang yata (rays) ning aldo masilang,
Ilang simbulu ring walung lalawigan
A minunang diling tinikdo, mig-aklas
Laban king Espanya ban milayang ganap;
A nung nu’ bistaman ding kekatang armas
Talibung la’t pana, sumpak ampon tabak
Ding ninunu tamu e la pepaysindak
Karing mapanlupig a keti dinalpak;
Lalam ning bandera a meging sagisag
Ning balen, den e re likwan makakasat
Keng gabun iti’nang simbulu nang maslag
Ning pakamalan ta’ng Indung Pilipinas!
Katungkulan tamu bilang Pilipinu
Ing igalang taya ing Bandera tamu;
Nung mipaintagun keng arap kapitolyu,
Munisipyu at/o gusaling publiku,
Tatas de ing Bandera neng daralan tamu,
Mamandal ta’ pamu ban munye respetu
Kabang paytas ya’t e pa miladlad ustu;
Pablasang ing balang metung kekatamu
Katungkulan na ing tupad at mamintu
Karing saligan nang batas ning gubyernu.
Antining iti yang tune kakatawan
King Indung Balen a kekatang santungan,
A e sukat gawan biru kapilan man
Uling iti ganap a kalapastanganan,
At anti me waring dekurak a dangal
Ing kekang sarili’t liping pipumpunan
Kabud lalam na ning sagradung bili nyan
Antimong larawan ning labwad ta’ng tibwan,
E tamu gewa ing kailangan gampanan
Bilang anak niti king tamak a lugal.
Idatuk taya iti karing kabubuslan
Ding kekatang pusu uling yang larawan
Ning Indung Balen a kekatang sandigan;
Luguran ya uling bunga nia mu naman
Ding bayani tamung mesawi at mibwal
King ikatimawa na ning Indung Balayan,
At mabie kayarle ning bandila ta’ng mal
A penakap karing marimlang katawan,
Ding mealang kalma keng pamakipagkal.
Laban karing buangis a mapanalipan!
Iti e mu bukud anting paganaka
Kekatamu bilang memalen ning bansa,
Nune sana pin neng tatas ta’yang sarya
Iting simbulu ning masapsap dang nasa,
Ding bayaning mibwal king parang ning digma,
King iti sukat yang suywan kabang-kaba,
At busal ning salu karin idambana;
Kambe ning adwan ta’ng lubus kang Bathala,
Ing itamu ganap ta’nang mitimawa,
Lalam nang tagdan ning mal tamung Bandila!
