(Bilang pagbibigay daan sa sumulat ng tulaing inyong matutunghayan sa aming isyu ngayon, na hiniling ni Roilingel Calilung, (Librarian ng Angeles City Libraray) na isulat ni Francisco M. Guinto, isang kilala at laureadong makatang Kapampangan, para sa ika-limampung (50th) taong pagkatatag ng Siyudad ng Angeles, malugod naming inihahandog sa inyo aming mga mahal na mambabasa ang isa sa madamdamin niyang panulat. Sana’y maibigan ninyo at maging marapat para sa inyong maselang panlasa).
MEKENI, at tukian mu ku, Indung Balen Kapampangan
Sulapo katang magmain karin king banuang katasan;
Karas babo ning alapap keni miuman teng’ batiawan
Iting masikoting baryu… ketang dane ning Amianan;
Sakup ne ning San Feranando a katmung berding tanaman
At mangalabung a Culiat…lagyu’t bansag nang ibatan.
“Diez y ocho veinti nueve, Diciembre ocho” ing petsa,
Iting baryu na ning Culiat meging balen ne kanita;
King uli ning tagimpan da ding banal a miasawa,
Y Don Angel de Miranda at esposang y Rosalia,
Pigampa ra ing Angeles mika-sariling Parokya
Ban ding malda rang magobra akua reting makasimba.
Y Don Angel at Rosalia, mibata lang kasakitan
Bayu memungang tagumpe masampat dang kapagnasan;
Atabi ro ding beluga a’yalang pilming tuknangan
Ban bitasang alang subyang, pamang-gubat king kakewan;
At kaibat ning walong banua, ding opisyal ning pisamban,
Kilala re ing Angeles bilang metung a balayan.
At manibat na kanita, migmula na ing progreso,
Misaplala no’ kabiayan ding memalen Angeleño,
Lalu’t ing “Fort Stotesenburg” mitatag yang maging kampo,
Kaibat meging ‘Clark Air Base’ yang kuta ding Amerikano;
Kanita ing ekonomya sinigpo na’t minasenso,
Minangat ya ing Angeles… mauna keng San Fernando.
Ketang bayu pa mamaksing itang giyera karin Vietnam,
Ing “DEPENSA” na ning U.S. lakwas neng pepatatag yan;
Libu-libo lang sundalos king “Clark Air Base” memaniatang,
Tubud no’ ning Amerika, kaniang digma pikabaluan;
Kanyan ya lalong meragul sakup ning ‘base militar”
At meragul ya mu naman – Angeles ing kayang “income”.
Uling dakal nong’ metanggap king kilub kampo megobra,
Keti na la memanuknang pati na reng pamilya ra;
Keti la naman migsantung deng mangilag keng problema,
Potang karing gamat ding Huk – kabud na la madisgrasya;
Uling sapat neng “income” na, pati ing populasyon na,
Inapag da king “CONSEJO” king iti maging siyudad ya.
Mayor Rafael del Rosario, king “Charter” ya ing sinulat,
Kayabe neng mibalangkas y Atty. Enrique Tayag;
Juanita Nepomuceno – Diputadong biasa’t tanak,
King Kongreso yang ‘Sponsor”, ing “bill” mipasar yang agad
Ketang libo siyam a ralan, anam a pulu at apat (1964),
Ing balayan ning Angeles… meging moderno neng siyudad!
Neng Francisco M. Guinto
Barangay Sta. Maria
Macabebe, Pampanga
