Ing asu, kaibat nang kekata mebarug
Mako yang tahimik, magkera king suluk;
Penandit awsan me, mangat ya balugbug
At lumapit kekang makaruku buntuk.
Ustung mamako ka, nung e me agwantan
Tutuki yang pilmi king kekang puntalan;
At neng daratang ka sasagana neman
Papasag ya iki at aplit paglukswan.
Ding asu e ra ka kusang panganyaya
At lakwan ban tuki karetang aliwa.
Tapat lang makyabe; e la magtanam mwa
Malugud la ampon sari kaganaka.
E me man ituru ing sese mung asu
Akilala na ka agyang ken mung bau;
At ing kekang bosis pati na istilu
Sadyang e milingad kaniting asu mu.
Ding asu atin lang tagle abilidad
A’yala king tau mabilug a labwad;
Araramdaman da nung ating maganap
A nanu mang klasing sigwa’t kalamidad.
Magsakripisyu la para magligtas bie
Ninu man kareting keyang katu-bale,
Kalupa ning asu a kekeng asese
Kabud nia mengaskad, malalagwang mete.
Mapilan penandit kamate ning asu
Ating kinulait ketang teleponu;
At basi king keyang mabilis a kwentu
“Meskup ya pu salu ing pangunakan yu;
Idala mi ya pu sana king ospital
Uling e mi balu ing sukat ming gawan,
Dapot anti waring milagru ing dintang
Mesalese ya pung alang nanu naman.
King milyaring iti king pangunakan ku,
Bigla keng aisip mangubie apu ku;
Pane nang sasabyan manyese kung asu;
“Magligtas lang bie ren pakatandanan mu”
Dapot ating asung e mayap a dapat,
A maluat nang usu keti Pilipinas;
Ila retang misan mia e apalaklak,
King kasiping bale agad nang lumipat
Dakal la ngeni ring antiti ugali,
Magdatun la reti nung nu’ la kakabsi;
Nung aburyan daka keka la takiki,
Ing masulit mupin den ala lang iki.
At deng klasing deti matindi la ‘rabies’
Agad lang sasagpang at milalu bagsik,
Nya ban makapihung e la makakinis
Busalan la pambuk a misna katigik .
At den ila kabud ding akakit tamu
Pane makayampiad karing pulitiku,
A menasa atyu ken king Kapitolyu,
Munisipyu ampon tanggapan publiku.
Ding asung deti a kanakung binggitan
Ila ring keraklan makasira misan
Karing pulitikung karelang tutukyan
Uling king dapat da a pikakasaman.
Bista’t laganas e makanyan a gawa,
Mayap na ing ugaling e makasukmama;
Nung ating mituran kening meging paksa,
Neng iti dapat yu – e ko’ sukat mimwa;
(Magbayu na kayu – at magpaka-PUSA!)
Vhelle V. Garcia
Abu Dhabi, United Arab Emirates
October 23, 2011
