KASIBULAN pamu ing idad nang Lydia
Inyang i Don Pedro a meto’ makualta,
Pemalaynan ne iti karing pengari na
King e na kaburian niting dalagita.
Malagua’t salita, mitakda ing kasal
Ning kalulung Lydia kening mayakayan,
A e bitasa mang keya memanikan
Dapot kabud da nia mu pekitanguanan.
Bispera ning kasal, aisip na kabud
Ing takasan na iti’t munta king malaut,
Ban ing keyang pusu a bina pang bubut
King salpak at pait e magdusang mukuk.
Dapot e pa bina mang milaut iti
Ikua reng atagal king gamat nang Romy,
A kepalsinta nang tune ning babai
King agiang kalulu yamu ing lalaki.
At kabud ikua rang metukup king gubat
Deting alang balung pilisunan sukat,
Gewa ning babai ta’ne agad dikdak
King keyang salu ing punyal na king gamat.
Ban e ya mapilit kasal king lalaki
A e na ayamyam tune maging kasi,
Tula na pa’ing mate, kesa kening Romy
A sinta nang tune ikwani re’yti.
Ining Romy kabud ikit neng mibulang
I Lydia, a keyang binang pakamalan,
Begut ne king salu nang Lydia ing sundang
At king keyang salu tinarak nia misan.
Sikban ne ning Romy king pangapase na,
Ing gabak nang salu ning kalulung Lydia,
At bayu la reti mepatad inawa
Anti’la keni ring tauling amanu ra:
Mangga, na king mangga, asahan mu bandi
Ing ika mu bukud ing king pusung ini,
Manatiling mabie’t milarawan keni
Uling ikang tune kanaku mal dili”.
At milagro waring ibat king katasan
Ing karin miliari ketang kaorasan,
Nanu’t bigla na lang limbug king limputan
Ding bankala reting adua king piarapan.
Mapilan aldo ing mabilis linabas
Kaybat ning eksenang milyari king gubat,
King dayang misalwak karing adua ibat
Metung yang tanaman ing linto na’t sukat.
At kalabas na ning mapilan pang banua
Meniampaga ya iti’t layun mika bunga,
A’yalang keliwan ketang itsura ra
Ding pusu ring tau king aske’t alkus da.
Memayutputan ya karing kule luntian
At paka-sapunggul a meging bunga nian,
Nung inya dakal lang metuksung menagtal
Karing bunga niti a binang makagiam.
At apansinan ding mekatakman karen
King bina lang maslam neng bubut la pa ren;
Dapot yuyumu la nung ta’ro paburen
King impun at e ro agad agtalan den
.
Ngana wari nita, ing agtal keng pilit
Lalut’ king lagyu ning sinta, sakdal pait;
Pablasang ing sintang mekua king pirait
Lubas king ligaya king balang penandit.
At kanita ra’na aganaka reti
King ing pun dutung a tinubung yan keni,
Ya kabud simbolo ning lugud nang Romy
At ning kang Lydia king mesabing lalaki.
Ing salitang igkas nang Romy king ngana
“Mangga na king mangga” manatili keya
Ing alang kupas nang pakamal kang Lydia
Iti yang mikintal king kaisipan da.
Ibat na kanita king mesabing lugal
“Mangga” ing yaus da king pun dutung a yan,
Nung nu’ angga na pin ngening salukuyan
Mangga pa murin ing aus da ring dakal!
