NUNG METUNG ya karing pagnasan isulung
ning lalawigan ing miuman yang magambul
Ing Salitang menan a sadyang malabung
At sese keng dilig ning mayubung sibul
E kaya masampat bayu ipalual da
Ing buri rang sabyan o isulat sana
Ding aliwa, anti mo ring keng Tri-Media,
Pagaralan da pa ing sukat yapse ra?
O mangutang la pa karing makaintindi
at talagang biasa king mana tang’ Sabi,
Ban e ra ka’tamu lalung pamagsisti
king e makatud a pamamigkas pati.
At nu’ ring amanu igkas da nung misan
Malaut lang bina a kapupuntalan,
Nung inya liyus king tatag ya kabilyan
Mekad mu anti r’yang lulumud itinan.
Partikular karing keng Radio at TV,
a nung nu’ lalu yang mimina kareti,
karing amanu rang gagamitan deti
a e ustu bigkas at/o pangasabi.
Antimo pin ing salitang ‘agnan-agnan,’
yan e ‘sabe-sabe’ sukat igkas, sabyan;
E uling ‘sabay’ ya king Katagalugan
‘Sabe’ ya kekata keti Kapampangan.
Atin mu naman ken, gagamit madalas
king salitang ‘di ba’ keng metung a sikat
a ‘TV station, a matuang e palak
karing insanu man a bayu pang buklat.
Halimbawa: “di ba pisabi tana yan?”
mali ya, e sukat sabyan ing makanyan;
Nune pin “e wari pisabi tana yan”
ban e masisira panga-Kapampangan!
Ing salitang ‘tuloy-tuloy’ Tagalug ya,
at ‘bala-balaus’ ing kabaldugan na
King sarili tamung Salita, nung inya
e makatud sabyan ing anti kanita.
Antimurin naman ing pamangamit ‘nga’
Yan e ya mu naman makatud bitasa
Uling king kekatang sariling Salita
‘pin’ ing katumbalas nang malino, Kaka.
At e la mapilan ding makapanalbe
kareting istasyun a kakung siglawe,
A nung nu’ tamu pin makarandam pane
salitang e sukat king kekata’ yabe.
Kalupa namo ning ‘Lasa na ning Ginu’
a kepampanganan da’t ayalben tamu,
Keng sikat a channel a nung nu’ balamu
e Kapampangan ing mig-‘translate’ siguru.
O milikas karing amanung megamit
ibat king pikuanan a salitang ‘English’
Uling nanan ta’la mang tingiran pilit,
ding Amanu e la ustu panga-gamit..
Yarin itang imbut ta’yang palabungan
antimo king sadya ing Salitang Menan,
Nanu’t e tamu pu subukan mangutang
karing ating balu keng bage makanyan?
Bayu ta’ mangangas gumamit salita
A magkang e ustu o posibling akma,
King nasang sabyan o buring ipawaga
Ala nang muna keng isangguni ta’pa.
Ing Aguman Talasulat Capampangan
atin yang agawa banting malarin yan,
Nya bilang Pamuntuk na niting Aguman,
aku na ing kusang mamaluk kasaupan
Karing talasulat a bisang mabiasa
king Amanung Sisuan o Salitang mana,
Ban mitud king ustu ing maling balu ra’
ding aliwa ampon kabaru keng Media!
