Eku kenu’t-kenu karing ninu pa man
Keni San Simon ing dapat parsalanan
King ngeni e tamu balu nung ngan
Karing honorable ing e miulingan;
King panga-apruba ning pilan ektarya
A gabun asikan maging industrial ya
Samantalang iti produktibu ya pa
Antimong palayan e makapagduda?
At ngeni pin oren manos la ngang gamat
Dening kinumpormi keng pangatalakad
Nining ‘aluminum factory’ Manabak,
San Pedro, San Simon ding di’pa ning mayap!
Nung inya pin imbes deti purian ta’la
Ngening mipaniangkan la ren king gawa ra,
Linto ing balamu metung man karela
E ta balu ing ken kapakibatan da.
Ninung minapag king Mosyon a kailangang
King Sesyon a sukat da reting pisabyan,
Ya ing magpalino nu’ anti santing yan
Bayu ding aliwa re pisanmetungan.
Nanu pata, kaibat miras ya king Bise
Ban suguan agpang yan king mepisabi;
Next to the office of the Mayor de iti
Yapag ‘for approval and/or finality’.
A mangabaldugan, yan okey yan kaya
Kabud pinirman ne – at ken ing pasala
E na’na malyaing kang Bise ipasa
O karing Konsehal agiang numanu ya.
Atin yang upayang i-‘veto’ o sagkan
Ing Resolusyon ning Sangguniang Bayan
Nung e ya kumporme i Mayor – ninu man
‘At his own option’ e ne apilit pirmaan.
Misakub na’ing sabo ning pamisanmetung
Ding mapuring anak ning balen San Simon,
Uling natural na karing balang metung
Ing pagsadyan den ing tutuking eleksyon.
Yan king uli na ning sari-sarili rang
Ambisyun a mika tsansa yamu namang
Mag-mayor i Dading o ing ninu ya man
Karing ngeni makalukluk a Konsehal.
A mipuk agad king matas a posisyon
Kilub ning e binang makabang panaun.
Lalu pa’t nung ngeni atin neng ambisyon
Ing ninu pa man ping anak ning San Simon.
Subali king agad ya’yting makilala
Gelingan ban bukas iti agamit na,
Atyu ken maralas itang maging mitsa
Ning imbes mipanuan, mipapakarok la.
Meyakit king ining ngeni pa tinalbug
Keng antiti, oyan – bista man pin dimut
Ing beluan na niti, migmayor nya kabud
King e na asahan keya mipagkalub.
Ing bie keting yatu masulit tarukan
Nung nu’ anti iti kalalam nung misan,
Nya paganaka ku keka Mayor Ryan,
Ing napun king bie mu balu mung balikdan.
Uli ning kasebyan da keng ding makatua
Ing alang balikid kanung ibatan na,
E ya miras king bie makarikil keya
Nung e ne balikdan ing penibatan na.!~
