Alang matsura keng pamaninum alak
Uling yan king tau natural na mekad
Pero nung sobra na, king pelalung mayap
A tau, mamungang maragul a pintas.
Ding pantas, parating mapili lang bina
King nanu mang bage yapse na ning dila;
Inia nung kapilan la reti tutukba
Karin la maingat bubugnus salita.
At uling madalas impun na at sepu
Menasa ning alak ing dakal a gulu,
E ta’na makitua nung waman ing palsu
Yang keta nung misan pipilit nang ustu.
Inia agiang e mu ayakmul nung misan
Ing nanu mang bage a e karampatan,
Metung mu ing sukat a pakatandanan
Ban e ka milisya king tamak a dalan;
Keta nung ala kang asabing matinu
Mapang e palak ing pabusten mu niamu;
Uling magkang magkamali ka pang sapu
Maging mitsa na ning pamituang e tutu.
Nung parehu na kayung magalasgas
At ala nang kontrol keng pamipakibat,
Iti pihung alang kama-ulian mayap
Pasari namu ning e ko’ mipalabas.
Pablasang ing alak, kasebian pin kabud
Yan king atian dapat diretsung papalub,
Uling kabud iti king utak tinaglus
Madiskaril ya ing pelalu katunud!
