NGENING miayaliwa na ngang mangatinding kalamidad
Ing alus mituki-tuking digpa keti Pilipinas,
Nung nu’ ing tauling milyari ing karin Leyte minlasak,
Dakal a bale ampo pang istrakturang mangatatag –
A tenge na nitang angin pati matibe rang atap
Kabang ing bagyung Yolanda titiup yang alang patanat.
Iti malino piakitan king ing ‘climate change’ dang ausan
Maragul na ing epekto na keting yatung pagkarinan;
Pablasang king kelan tamung malasakit king natural
At likas a pulayi ning mal tang Indung Kalikasan,
Kalupa na alimbawa ning e ta’la patugutan,
Kakalbuan ding pundutung at pane ta’yang kukulkulan
Ing gilid da reting bunduk pasari ning pamagmina
Ampon aliwa pang bage posibleng ikasira na,
Iti nung e ra pasdalan ding keng balen manimuna,
Datang alang kapilisian mas matindi ing datang pa
A malyaring ikasintang ning sablang bie mangisnawa
Kabud migpabaya tamu at gewa tang’ alang kwenta
Ing ngeni patitak-ditak akmulan ning pamagbayu
Nang aske ning klima ampon temperatura ning yatu
Ing eganagang bage pati kapanwalan tamu,
Ing ating metung a Dios keti babo na ning yatu
A sukat panaligan ban akabiusan iting disku
Lalam ning Keyang patnube at pakamal Nang masolu.
Ing nanu mang kalamidad a malyaring salisi pa,
Masagka ngan kambe na ning lubus tang’ tiwala Keya
At e ta’ pabusten mate sablang bage lelangan Na,
A sukat tang pakamalan lalam ning asul a banua;
At nung bakit neng masikan ing uran a keta dagpa,
Akakua nang lalambut ning gabun a katutukluan da
Ding tanaman karing bunduk a paniagka kaniang danum
A tigtug ning kalikasan ban e mabilis tulandung
Natural mu, ing lubak a pangakapit iting gabun
Karing uyat ding tanaman neng parating makukulkul
Keng bawal a pagmina’t pamangutud dang pundutung
Ding ‘illegal loggers’ ampon gagawang uling o karbon.
Inya banting manatiling masese ing kalikasan
At e manganib a bili karing mekalbung kakewan,
Pasibayu mamunla tang mialiwang klasing tanaman
At itanam ta’la karing kekatamung kakewan,
Ban king aldo na ning bukas, pasibayu magbalik ngan
Ing natural a klima na niting yatu tang’ santungan.
Pablasang den e mu kabud itang ila ring parimla
Keng tiup ning angin a amiam, nune kambilan ta’la pa
Potang ing bagul na niti mamuangit at daragsa na
Ing nanu mang klasing bage malagua nang apatomba;
Uli na ning pihung e na ne kabas ning sadia
Potang dakal nang tanaman a kaniti mamaguanta.
Inya kaministilan mu ing miuman tang’ mananaman
A mialiwa pang pundutung kareng gilid da ring dalan,
At ding makatalakad pang atyu karing kabundukan
Banten ta’la at e pamu ipakutud kaninu man,
Ban keta ing sadiang aske ning Indu tang’ kalikasan
Magbalik anti ing sadia – ing mamutiawi nang legwan!
