Nanu mo pin kaya ing kakung asuyu
ngening ining belwan king bie ku dimut mu?
Akung e mikalmang mekilala lagyu,
Angga mung dayatan ing kakung abalu;
karin a ing balang pawas kung tinulu,
ding meging bunga na binutil lang gintu.
King nanung bage ku mekasuyu keka
Inyang mandaywan ku’t keti likwan daka?
Aku a miwale king kanakung sinta,
madalas sulat man alang kaku dagpa;
Karin, a ing balang aldo kung pibata,
King mingatbang palad asasalat mo pa.
Akung alang balu king Salitang andam,
king insanung Sabi ku makipag-utanayan?
Antimo pin karing tune matenakan,
king Salitang mangibabo nukarin man;
Karin, a nung nu’la reti mitalandang
detang meging bini ring malansang asan!
At aku pin nanung keka isuyu ku
ngening buryan ku man, e ku rugu agyu;
Sigpo ku man, e ku miras king marayu,
pasari namu ning meki-alkas ku mu;
Ing megaral at ing ali, mikandayu
king nanu mang aske – at iti ing tutu.
Nanung malyari kung isuyung aliwa
anti na ning bait ku mu ping maluka?
Ah, mekad lalam ning mal tamung Bandila
potang mirikil ing sukat ipamingwa
ing Kalayan laban mapanalipusta,
itaya ku’ing bie ku, e ka sa’ miragsa!
Aku, a metung mung kawal ning panyulat
e mu king sikanan asuywan da kang lat !
pablasang e mu pin king Kislap ning Tabak
masusubuk keti ing tapang at tatag;
Kanita, a nung nu’ king Noli milablab,
ngeni king danggut ding pluma miuman sunlag.
Sabing Capampangan a meging makule
king bungang diwa ra ding anak mung tune,
king kapilan pa man iti e ya mate
karing bilungan na ning musika’t arte;
Keti, a ing sana ganap neng masese
ban ding suli reti akwa rang kulate.
Akung e mapalad a meging mabandi
nanung isyu kung migit pa kaniti?
Ala, nu’ne mekad ing maging masilbi
keka balayan ku at karing mal dili;
Karin, a ing sana ing tenam tang iti,
mupul kang dangalan at maging mapuri!~
