1.
Indredus, asal de ring masalacata
picacasaman at tutung macasora
na lang cabalisan, babangnas la wawa
nung king patingapun, e la magsalita
cuentung samut-samut, amanung pigawa
ing pane apse ring, magatal dang dila
2.
Ala lang damdaman, a e ra i-tsismis
a miraragdagan neng ilang maglabit
metung a cataya, reting a ulingid
amanung sabyan da, dinalan na migit
inia ustung deti ring, miyakit-akit
tatabuan la waring, king angin sisitsit
3.
Cagising da agiang, e la pa migmulmul
lage no king dalan, ban mitipuntipun
nanu mang pacsa dang e meyari napun
ya ing pisabyan da anggang gatpanapun
arap ning tindahan karin la maratun
muli la mu ustung ume nang dalumdum
4.
balang lalabas a carelang cabaryu
siguradung atin lang balung icuentu
nung inia maralas lang milub king gulu
uli ning istoryang purus ngang imbentu
bulbul ya mang pusa o bulbul ning asu
pitaidtayran da, agiang macananu
5.
Neng ating susugud caring piglabit da
e ra na balu ing gawan da canita
ila-ila mismu mipapanuldu la
at king piyarapan mipapangaga na
nung macananung ing cuentu mig-umpisa
ding anggang casangcut e ra a isplica
6.
inia ing payul cu caring ma-indredus
king calabitan yu dapat cong patugut
caring kecong anac ing matsurang yamut
ning tsismis e yu na pabustan pang sirut
uling yan mengari yang maroc a dicut
sucal a tinubung, dapat mung maputput…
