Lumipad ka ibon,
sa gitna ng mga ulap
Malayang iwagayway,
matikas mong mga pakpak
Hayaang matangay,
ng hanging humahampas
Habang tumatagal,
Masanay kang lumalayag
Hanggat di maabot,
Sukdulan ng iyong nasa
Huwag kang titigil,
Kung may kabang nadarama
Pag ito’y nangyari,
Malalaglag ka sa lupa,
Ito man ay pagsubok,
Huwag mawalan ng pag-asa
Tanging habilin ko,
Kung nasa itaas ka na
Gawa’y di magumon,
Sa sandaliang ligaya
Ang lahat ng bagay,
Angkining pansamantala
Ngayo’y nasa taas ka,
Babalik rin sa ibaba
Kung unos ay dumating,
Huminto ka sumandali
Itikom mga pakpak,
Sa mga daho’y maglagi
Ga’t di tumitigil,
Patak ng ula’y di pawi
Ang sikat ng araw,
Sisilay ng mayro’ng ngiti
Ibong man o tao,
Kaakibat ang pangarap
Iba’y nabibigo,
Gaano mang pagsisikap
Yaong nagtagumpay,
Kahit daan ay madawag
Ni hindi sumuko,
Lumalaban ng parehas.
