(Ban e malumpawi at manatili yang mabie ing
Salitang Capampangan karing danggut tamung dila,
ing artikulu na ning matenakan tamung ‘Editor-in-Chief,’
a mipaskil keng ‘online edition’ ning PUNTO Central
Luzon News, at linikas na king Amanung Sisuan ning
anak kung i Marvel, a makipagobra Abu Dhabi, ya
pamung ibie ning maluka yung talasuyu paraking
malugud dang pamamasa ring kalalawigan tamu).
Lea Salonga:
P***** inda, mal kung Indung Pilipinas
Kasulit mung kening pusu ku isikap.
Presidente Duterte:
At isipan, insanung pekamabandi
Ilang alang patna gagatas parati
Karing ken kekatang pilisunan bandi
Angga king agisan dang akamkam iti?
I Boni at ing balen:
Pamalsinta king labuad a tibuan
INSANU pang lugud ing migit pa kaya
King panga-dalise at panga-dakila,
Anti ing pakamal king tibuan a bansa?
Insanu pang lugud? Alana pin, ala!
Ulit-ulitan mang basan na ning isip
At pitunggal-tunggal talastasan pilit
Ing salita at bie, limbag at ginulis
ning metung a tau iti amamasid.
Pamalsintang banal nung ika ing datang
king tulid pusu ning ninu’t insanu man,
pati taung gubat, kalulu at mangmang
maging dakila la at kagalang-galang.
Lubus a kapuryan ing nasa’t pigagap
king balen ning taung ting’ dangal a ingat,
magkanta, gumale, makda at sumulat
pati degulan da pabalu ra’t sukat.
Alang maulaga a e na dinaun
ning mal nang pusu king balen a minampun,
daya, pagal, belwan, pibandian a tipun,
mapatlud man ing bie keng dusa’t pagmalun.
Bakit? Nanu iting sakdal king kalualas
a miyampanganan pamalsintang wagas
at keng lalu kamal malilyari’t sukat,
mirarakayan bie ding meyalang palad.
Ay! Iti ing Indung Balen tamung tibuan,
ya ing tune indu’t bukud amulatan
nitang makagiam a aslag nang lalantang
ning aldo, a babie pali king katawan.
Keya utang iting munang pangasangap
king samyu ning angin, a babie na lunas
king puput a pusu a sisingap-singap
lalam ning balun ning kabiguan at kaplas
Kalangkap na niti lugud king Balayan
Ing sabla at lalung keng panalala mal
Ibat king masaya ning bie kamusmusan
Angga king dulung ya bangke king kutkutan
