Guinung Jesucristo pisali neng Judas
dapot ketang cayang catacsilang depat
pigsisia’nang lubus at piniawad tawad
Marahil pauli ning sobra nang dine
caring apostoles niting acayabe
mas pinili na ing careti miwale
capamilata ‘ning pamagpacamate
Mecad aisip na, ala na ring sangcan
a mie ya pa uling sira ne dangalan
at ing tiwala ring cayang cayabiayan
e na na abalic agiang capilan man
Nanan na pin naman ing cumabie ya pa
nung e no matula ring abe na caya
lunto namung ala yang delicadesa
nung pamilit ne pa itang sarili na
Samantalang detang tacsil king balayan
a nanapnap ketang lama’na ning caban
o ren pang mabibie cambe ring lamiran,
mulalang butanting mibabayaranan
Mayap ne man palang e palac i Judas
king catacsila’na dacallang miligtas;
o ring puliticu a memanarampas
uli ra dacal lang dungus ding mangaplas
Obat ayamyam ning carelang cunsensiya,
panganyaya ro ding migtiwalang masa
king macacasnuc a cararaptanan da,
I Judas careti e tumud balandra
Ding memalen ila ring magsacripisyu
at anting mamusan curus king calbaryu
cabang ding hudas king kecatang gubyernu
magpacasasa la king carelang pwestu
Angga ta’na ketang talapusan curus
a malambat-lambat namu ring guguyud;
Tinggap tang parusa ume yang mapupus
potang mate ta na king milalung danup
Deti sanang hudas caring manungculan
pati ring butantis, a hudas mu naman
aisip da sanang mamagbigti no ngan
ba ta nang micabus kaniang casakitan.
Inia caugne nian at nu’ ban mapatpat
ing anti caniting e mayap a dapat,
ding neng elecsyun mu lalto at mamarap
pero cayalal da e ta’no acapcap.
Calupa ring dacal a consehales ken
a e man tatagun caring sesyon da ren,
Pero akinse at capupusan, oren
atilu tanggapan ning Caban ning Balen
Mangabaldugan mu ing maniad lang sueldu,
king agia ala lang gewa agiang nanu;
Caren dapat tamung mingat cabalen cu,
ban e manapnap a pera ing gubyernu.
Antimurin naman caring aliwa pa,
a makiki-alkas patugut no’ sana;
Uling nung e murin banal ing nasa ra,
ing kalulung balen ya rugung magdusa!*
Vhelle V. Garcia
Abril 3, 2016
Abu Dhabi, U.A.E.
