1.
Ken mung atlung pulu a pirasung pilak
Guinung Hesukristo pisali neng judas
dapot ketang kayang, kataksilang depat
pigsisia’nang lubus, at piniawad tawad
2
Marahil pauli ning sobra nang dine
karing apostoles niting akayabe
mas pinili na ing kareti miwale
kapamilata’ning pamagpakamate
3.
Mekad aisip na, ala na ring sangkan
a mie ya pa uling sira ne dangalan
at ing tiwala ring kayang kayabiayan
e na na abalik, baski pa kapilan
4.
Nanan na pin naman, ing kumabie ya pa
nung e no matula ring abe na kaya
lunto na ing ala yang delikadesa
nung pamilit ne pa itang sarili na
5.
Samantalang detang, taksil king balayan
a nanapnap ketang, lama’na ning kaban
o retang mabibie, kambe ring lamirang
mulalang butanting, mibabayaranan
6.
Mayap ne man palang e palak i Judas
king kataksila’na, daka’lang miligtas
o ring pulitiku a memanarampas
uli ra daka’lang dungus ding mangaplas
7.
Ot ayamyam na ning karelang kunsensiya
panganyaya ro ring migtiwalang masa
king makakasnuk a kararaptanan da
I Judas kareti e tumud balandra
8.
Ding memalen ila ring magsakripisyu
a waring mamusang kurus king kalbaryu
kabang ding hudas king kekatang gubyernu
magpakasasa la king karelang pwestu
9.
Angga ta na ketang, talapusan kurus
a malambat-lambat ta na ring guguyd
tinggap tang parusa ume yang mapupus
potang mate ta na king milalung danup
10
Deti sanang hudas karing manungkulan
pati ring butanting, miki-kahudasan
aisip da sanang mamagbigti no ngan
ba ta nang mikabus kening kasakitan
