Kumbaga sa boksing, mabilis umilag
Sa ‘ting binitiwang suntok na upper-cut
Itong Kapitana na nakapag-‘make up’
Nang siya’y puntahan upang magsiyasat,
Ng isang tauhan ni Among Panlilio
Ang construction materials na diumano
Ay ‘inilihim’ sa nag-request po nito
Na PTA Chairman upang masiguro;
Na naroon nga ang gamit na naturan
Sa dahilang July pa diniliber yan,
Pero di sinabi liban sa principal,
Ng napakagaling na Punong Barangay;
Na nag-react sa ‘ting isinulat minsan,
Gayong hindi tukoy ang kayang pangalan;
At kung saan bunsod ng pangyayaring ‘yan
Ay siya, sa sarili ang kusang bumigay!
Pagkat nang mabasa nga ang isinulat
Ng inyong ‘yours truly’ ay nag-ingay agad;
At nasabing ang semento ay fifty bags,
Pero itong isa’y ‘twenty five’ lang lahat;
At talagang ipit na ang Kapitana
Sa ‘itinago’ niyang gamit pang-eskwela,
Kung naging maagap lamang sa tuwina
Ang PTA Chairman sa paghalungkat niya;
Na ang materyales matagal nang wala
At sa ibang bagay ay nagamit na nga,
Gaya ng anila’y personal po yata
Na pagka-gamit o tumigas na kaya;
Ang semento bunsod ng napakatagal
Na pagkaka-imbak ng kung ilang buwan;
Kaya’t sa sarili po nating pananaw
Ay ‘bago’ na itong kay Kap ay dinatnan;
Nitong ‘bumisita’ upang magsiyasat
Ang taga Capitol na nag-isyu’t sukat
Sa materyales na nakarating kay Kap
Kung naroon pa nga o ‘sunog’ ng lahat!
Kaya lang ng dahil na rin sa posibleng
Nakatunog si Kap na siya’y sisisiyatin,
Nakagawa yan ng paraan marahil
Upang i-produce ang lahat ng nasabing;
Construction materials bago pa dumating
Itong sa Capitol nakatakdang manding
Gampanan ang opisyal nitong tungkulin,
Kaya’t “save by the bell” ang tsampyon sa galing!
Na si Kapitana at itong Principal
Na noong una ay alumpihit po yan,
Sa dahilang di nila inaasahang
Matutuklasan yang ng PTA Chairman.
Pero kagaya nga ng ating nasabi,
Ngayong siya at ang amiga’t kumare
Niyang principal ay absuwelto na bale,
Ano pa ba kundi ‘closed case’ ang nangyari?
Subali’t kung naging mahigpit marahil
Sa pag-imbestiga ang nag-isyu mandin,
Ang unang bagay na kanyang mapapansin:
Ang semento’y di na pupuedeng gamitin?
(Pagkat sa tagal ng pagka-imbak na rin,
Ya’y ubod na ng tigas kung paka-isipin;
Kaya’t malinaw na masasabi nating
Ya’y bagong bili na kung paka-suriin!)
