sa pagka-absuwelto sa ating Hukuman
ng mga drug lords na salot sa lipunan,
ang siya munang ating ngayo’y pag-usapan.
Madalas, bagama’t di lubhang mahirap
ang pagsaliksik kung saan nag-uugat,
Pero sa isyung yan ang nagpapabigat
ay itong marami ang ayaw lumantad.
Una, kahit pa man may mga testigo
laban sa kung sinong salot sa gobyerno,
Natural lamang kung takot itong tao
hindi haharap yan sa ating Husgado.
Minsan naman nasa otorida na rin
kung bakit ang kaso walang nararating;
Papano nga kasi sila-sila mandin
ang nag-aagawan kung may kikitain!
Pero, kadalasan nasa Piskal at Huwes
ang kaganapan ng tunay na ‘due process’,
Malimit kahit na sapat ang ‘evidence’
acquittal lamang din ang posibleng ‘sentence’.
Papano nga kasi lalo pa’t may suhol
ang tinatawag na ‘under-the-table,’
Ligtas sa kaso ang pesteng mandarambong
at mga ”Drug Lords” na nagha-hari ngayon.
May posibilidad sa madaling sabi
itong hinala r’yan ng nakararami,
Na ang Justice System nati’y nabibili
nitong ang kwarta’y di galing sa mabuti.
Na kung saan kahit inimbentong kaso
at ni walang sapat na batayan ito,
Ya’y napakadaling aksyonan ng todo
Nitong hoodlums-in-robe kapagka ginusto?
Lalo’t ang nagsumbong mataba ang bulsa
at ang akusado ay salat sa pera,
Kahit ang huli ay hindi nagkasala
kulong kaagad yan kung walang pampyansa.
May ibang Judge kasi na di sinusunod
ang Art. 112 ng ating Rules of Court,
At ya’y kadalasan ng binabaluktot
Nitong subject nating ilang “Hoodlums-in-Robe!”
Kung alin ang krimeng marapat sugpuin
ang wari’y di nila mabigyang ng pansin;
Kaya’t maaaring ang hinala natin
Itong kung minsan ay umiiral pa rin.
Na kaya ang krimen imbes mabawasan,
kundi bagkus patuloy ang paglobo n’yan,
Ya’y sanhi ng justice system na mabagal
na nga kung umusad – nabibili pa yan?
At kailan titino ang lipunang ito
na may tinitingnan at/o sinisino?
Na kapag kasangga o hindi katalo
di hinihigpitan ng ating gobyerno?
Napapanahon na upang mangasimot
Itong kung binyagan nga ay hoodlums-in-robe,
Na siyang sa justice system nagpapaikot,
kapalit ng ubod kapal na envelope?
Na karaniwan ng bigay ng kung sinong
may illegal business o kaya transaksyong
Kailangan ang basbas ni Boss o ng “Ninong’
Ng organisadong negosyo’y “Underground”?!
