IBA, Zambales – Patay ang isang hinihinalang holdaper makaraan itong paulanan ng bala ng mga di pa nakikilalang suspek sakay ng single motorcycle sa bayang ito kamakalawa ng umaga.
Kinilala ng pulisya ang biktimang si Bernard Abasta, 42, tubong Dinalupihan, Bataan at residente ng Barangay San Lorenzo, Masinloc, Zambales.
Ang biktima ay nagtamo ng apat na tama ng bala mula sa kalibre 45 baril sa ibat-ibang bahagi ng katawan at idineklara itong dead-on-arrival sa President Ramon Magsaysay Memorial Hospital, ayon kay Dr. Joselito Glorioso.
Narekober sa pinangyarihan ng krimen ang apat na basyo ng bala ng kalibre 45 baril, 2 deformed slug at isang bala.
Batay sa record ng pulisya, ang biktima ay may standing case sa paglabag sa Comelec gun ban sa RTC Branch 71 at robbery with intimidation of person under Article 293 in Relation to Article 294 of the Revised Penal Code sa RTC Branch 69, Iba, Zambales na naka-file noong March 18, 2013.
