Nitong Lunes habang kami’y nasa prescon
Sa opisina ni ‘world class city mayor,’
Oscar S. Rodriguez, d’yan sa may Heroes Hall,
Ang aking anak na si Jeck ibinulong:
Na ang isang ina-anak niya sa kasal
Tumawag umano mula sa ospital
Ng JBL, at siya ang kanyang hiningan
Ng tulong para mailabas na niyan
Ang maysakit nitong anak na ‘months old’ lang,
Na diumano’y hindi yata natitingnan
Nitong nakatokang ‘attending physician’
Sa ‘pediatric ward’ ng naturang ospital
Sa loob ng ilang araw na lumipas
Kaya naisipan na nilang ilabas,
At kung maari ay sa iba ilipat
Upang mabigyan ng karampatang lunas
Kaysa makita nilang ang kanilang supling
Ay biglang manigas imbes na gumaling
Diyan sa JBL na halos di pansin
Ng ilang doctor ang kanilang hinaing.
Kung kaya bunsod niyan nagesisyon silang
Mailabas na sa naturang ospital
Ang kanilang anak kaysa manganib lang
Na mawala sanhi ng kapabayaan.
Posibleng totoo itong madalas na
Ating naririnig sa labi ng iba,
Pagkat ito rin ang aking nakikita
Sa malimit ko ring dito pagbisita.
Isa sa malubhang dahilan kung bakit
Imbes gumaling diyan ang ibang maysakit,
Ay itong kung wala kang pambili kahit
Bulak lamang ano ang puedeng ipahid?
Sa sugat o anumang ‘minor surgery’
Kung kapos sa pera ang isang pasyente?
Di lalo na itong nasa ‘emergency’
Na karaniwan ng laging ‘fifty-fifty’?
Sapagkat kung wala ka nga ni pambili
Ng alcohol man lang anong mangyayari?
Nand’yan ang problemang pinakamatindi
Na dapat mabigyan ng ‘first priority’
Ng ‘Department of Health’ sa kasalukuyan
O ni PNoy mismo kung kinakailangan;
Dahilan na rin sa ya’y di pamprobinsyal
At di sa kamay ni “Nanay’ naka-atang
Ang pagbibigay ng kailangang ayuda
Upang isa-ayos ang lahat-lahat na;
Gaya nitong mga pinatayo na niya
Sa ilang komunidad sa ating probinsya.
Na tunay naman ding ang pangangailangan
Sa lahat ng kagamitang pang-medikal,
Ay napakadaling bigyang kalutasan
Ng gobernador na madaling lapitan.
Na kung saan pati wala na kumbaga
Sa hurisdiksyon ni Nanay Pineda,
Ay tinutulungan pa mandin po niya
Gaya ng Angeles na ‘chartered city’ na.
Di gaya ng ibang pulitiko natin
Na mas higit nilang binibigyang pansin
Ang susunod at/o halalang darating
Sa adyenda nila at ‘political will’.
Kundi ang sa kanya ay makapaglingkod
Sa lahat pati na sa wala sa sakop
Ng kanyang mandato bilang provincial guv
Maging sa Angeles na ‘chartered’ ng lungsod!
