Kapitanga’na ning bengi ing diwa kung mapagmain
Linibut ya ketang mula king busal na nitang ardin,
Tinalanga king katasan king banwa kayang apansin
Itang ulap a susuldan kakyalung na nitang angin,
Anti murin itang bulan pilibugtan de ring batwin
Misasabi la mo wari, karela ya manabilin.
Ing salang karelang babye keti sulip makasalbag
Pati alang panimanman, king sala meka-aninag,
King libutad na ning ardin daka’la ring kambubulag
King samyu da ring sampaga, milsinta la at mebiyag,
Ing kakung pamagumasid disa’na ning munag-munag
Inya king gulut ding bunduk ikit ke ing aldo saslag.
Ing sablang kakung akakit, pigunaman ku’t susuryan
Bakit mengatmu yang saya meto yatu king ketawan,
Detang ayup karing sanga teterak la’t mangundiman
Ing sapul na nitang angin ya ing notas dang tutukyan,
Itang malambing dang agus detang sapa at batisan
Manibatan karing pulu maki-agum a tigtigan.
Bakit kaya? At bakit pin? Iting yatu mitmung saya
Ding Angeles karin banwa daralit la’t magtumayla,
Ing siyudad na ning Angeles dating kule nang maputla
Miyalilan king sagakgak ampo pang makule tula,
Bigla kung mipabalikwas…kanita ku aganaka,
Aldo na palang beitan ning Mayor tang’ maganaka.
Magsaya ya iting lungsud king aldo nang kebaitan
Ning masipag tamung Mayor Hon. ED PAMINTUAN,
E uling dirina’nong parti ding memalen o pakanan
Nune, uling ing tungkul na matapat nang gagampanan,
Parehu ya panlalawe king kalulu at atinan
Kaya alang kabi-kabi pangaras keng katuliran.
Karetang kayang proyekto, mapilan lang sambitlan ku
Sakali ating malakto adwan kung panupaya yu,
Mumunang kakung banggitan ing obra na ning LUPAHO
A mitatag keting siyudad ban magsilbi karing tau
Ing nasa na itang gabun asali da ring kalulu
Kanita alang iskwater king labwad ding Angeleño.
At pablasang pagnasa’nang ding memalen ela sakit
Detang doctor manulu la, keng barangay la lalapit,
Ing panulu alang bayad, oyan kekayung akakit
Karetang kayang kabalen ing lugud na’t malasakit,
Uling ketang kayang pusu… ing prinsipyung makadukit
Ding maluka, ing kasnawan, akamtan dang kayang akit.
Telakad neng “CITY COLLEGE” kanita ding kayanakan
King karelang pamagaral mura mu ing babayaran,
Pablasang ya panwala’nang deti ilang kapanayan
King bukas na niting balen, ketang mayap a parasan,
Nung deti ela malingap at mirinan king kabyasnan
King daratang a panaun nang karelang payntungulan.
Utusa’ne itang ‘CENRO’ sapang balen yang palinis
At ing katahimikan pabante na karing pulis,
Proyekto nang “ONE MILLION TREE” patanam nalang mabilis
Inya pati detang ayup matula lang mipaglambis,
Ing sitsit na nitang angin notas waring maka-sunis
A babage king agus ding sapang pane malilinis.
Ding Angeles karin banwa magkanta la’t sasagakgak
Pablasang king syudad tamu… lalon deng aldo masaspak,
Ing dulum na ning milabas aslaga’nang ditak-ditak
Inya deting Angeleño magsaya la at teterak,
‘HAPPY, HAPPY BIRTHDAY MAYOR”, yang matni rang gugulisak
Mayor Edgardo Pamintuan king aldo nang panga-sapwak.
Amado N. Gigante
February 23, 2012
Barangay Anunas, Angeles City
