bini kang misalbag, miuma king gabun
inyang lulsut naka, sinese ning danum
king kapal ning palad, ning ibat sinarul
kayang kapagalan, ni e man migdatun.
halus aldo-aldo, dadalo parati
pota ‘ting dinugpa, mipaliling pesti
nung bulung didilo, deng kule mung berdi
pamigaganaka, ditak mung aparti.
nung kulang king danum, kati la deng kanal
pane panalangin, na sana ing muran
lalu na’t bayu pa, mikabungang dakal
pag-asang mabigu, keting kalibutan.
masias mung talakad, mabayat deng bunga
angin nung masikan, sukat mabalisa
ing maliaring pihu, na ika miragsa
mituknang ing buri, at maging payapa.
uran man nung sobra, mag-buu ‘yang albug
takpan nakang todu, anti kang nilumud
n’yang kumati na ngan, king palibut libut
makapal a burak, keka kinulaput.
megi kang mapalad, marakal ing pupul
ing mañese keka, saya ing binalung
saguli mu pala, kabud ‘ya migmalun
ing abli’t ginastus, luging patung-patung.
presyu mu ngeni, mas lalung mibaba
deting negosyante, a magsamantala
saup ning N.F.A., ngeni bale ala
pamanangkat abias, iyang migpalala.
alang akarapat, ining ortelanu
ibenta ing pale, king kamurang presyu
lalu nung kauran, e man langing ustu
panayang manaldo, ali siguradu.
dakal ng manasik, memisaling saka
saup king gobierno, e naka mamasa
selamangkang pondo, pilan lang memulsa
daratang ing bukas, ala nang taldawa.
guintung pale ka pin, siguru n’yang napun
ala na ing kinang, ngeni ning panaun
panulu kang danup, king bie mi pansudlung
pañulung ba’t keka, ‘lang pamikatagun.
