BILANG GOBERNADOR a peka-Indu ra
Ding balang memalen keti king Pampanga,
Aku, ika, ila ampon aliwa pa,
Pante-pante tamu mekad king lawe na.
At ala yang buring ipaygit ninu man
Ban alang masugat a kapanamdaman,
Partikular karing kandidatu kanian
A magsaria keya ban maniad kasaupan
Kapamilatan na ning saup pinansyal
O iendorsu na la karing kabarangay,
Inia imbes y Gob atin yang dirinan,
“Good luck” mu ing karen parati nang yampang.
At ngana kareti: “Mikabalu bayu,
Mikakamag-anak ampon mibabaryu
Obat ing gumastus ya pang isipan yu,
Lalu’t parehu kayung pakakalulu?”
Katutuan pin naman ing kang ‘Nanay Baby’
Para nanu’t pigastusan da pin iti?
Samantalang ilang yaluk da’ing sarili
Banting makasuyu at tapat magsilbi?
At serbisyu dapat ing yapag karela
Nganing amanu na ning Gobernadora,
At e pera banting akua ing botu ra
Nune pin nung ninu ring sukat yalal da
At karapat-dapat ilukluk king puestu,
Mapagmalasakit, tune magserbisyu.
Malugud at alang nanu pa mang bisyu
Ban ing tune lingap aibie rang ustu;
(At e kalupa ring aliwang Kapitan
Kagawad ampon pang aliwang opisyal,
A e mu abaklas keng arap ning sugal
Agiang keng lugal da ating mipatayan!
Samantalang iniang tatagal la pamu
Asna karakal ing karelang pangaku,
Kesyo gawan da ngan ing karelang agyu
Ban king barangay da lubus makasuyu)
Inya keng puntung yan posibleng y ‘Nanay’
Makanian yang alang iendorsu ninu man;
Bukud king ala yang buring manandaman,
Magkang mitud king e sukat manungkulan.
At nung gagamitan de man ing litratu
Ning gobernador keng karelang pulyetu,
E no’ babawalan nung keta mung ustu
At e labag agpang karing batas tamu.
At mipamintuan ing ausan ‘non-partisan
Barangay election,’ at ala metung man
Karing kandidatu ing saupan nang ‘Nanay’
Ban ipabotu ne o iendorsu mu man.
Nune ing bukud nang pakisabi karen,
Ing sana ala lang bage pipapatan;
Ing pamanataki e ra gagawan den,
Ban ing magdatila tune ‘peace and order’
At ngana pa niti nanu mang malyari,
Mibaryu-baryu ta’ pa murin – at iti
Ing king balen tamu sukat mapalyari
At king kaisipan sukat manatili.
Inya naman oyan, antining ala yang
Inindorsu karing tatagal ninu man,
Mekad mengimi nong’ lapitan de’y Nanay
Ding maniad suporta king ba’ta lang yalal;
Pablasang para kang Gob Lilia Pineda,
Paraparehu mu karen ing lawe na;
At kaya ala nang peka-maulaga
Nune ing sana pin deti matapat la!
