Masayang tinanggap ng mga ina ang gatas at vitamins mula mismo kay Mayor Aida Macalinao. Kuha ni Ernie Esconde
SAMAL, Bataan — Dinumog ng maraming tao, karamihan mga ina, ang pamimigay ng gatas at vitamins para sa mga bata Lunes ng hapon sa bayang ito.
Marami mang tao, hindi naman nawawala ang social distancing sa mga pila sa Barangay Santa Lucia kung saan mismong si Mayor Aida Macalinao ang nanguna sa pamamahagi ng gatas at vitamins.
Panay ang paalaala ng mga pulis at mga kawani ng barangay na panatilihin na maging maayos ang pila at huwag magdikit-dikit upang makaiwas sa coronavirus disease.
Ang Santa Lucia na may mahigit na 700 pamilya ay isa sa mga barangay ng Samal na wala isa mang kaso ng Covid–19 dahil sa mahigpit na pagpapatupad ng enhanced community quarantine.
Ang pamimigay ng gatas para sa mga bata ay bahagi ng Aksiyon Bayanihan Movement na inilunsad ni Macalinao upang matulungan lalo na ang mga kinakapos dahil sa enhanced community quarantine na pinalawig pa sa Bataan hanggang Mayo 15.
Nang nakaraang mga araw ay nagbigay si mayor ng bigas, canned goods at noodles samantalang ang iba naman ay namahagi ng lugaw bilang meryenda. May nagdadala ng kamoteng kahoy at mga gulay.
“Nagpapasalamat ako sa lahat ng tumutulong upang itong Aksiyon Bayanihan Movement namin ay maisakatuparan at ang lahat ng gusto nating ibigay na kailangan ng ating mga anak tulad ng gatas, diaper, at vitamins ay matupad,” sabi ni Macalinao.
