Tama’t nasasaad sa‘ting Konstitusyon
Na tayo ay mayrung ‘freedom of expression,’
Pero kasabihan, ‘it says in every rule’
Ay may tinatawag din namang ‘exception’
Kaya’t totoo mang may ‘existing’ batas
Hinggil sa paksang yan ay di pa rin dapat
Gawing sangkalan ng taong may dignidad
Ang diumano’y kalayaang magpahayag
Ng anong bagay na nakakainsulto
Para sa ‘ting kapwa o kahit na sino,
Pagkat ang ‘freedom of expression,’ pare ko
May limitasyon din sa pag-gamit nito.
Gaya halimbawa ng paglapastangan
Sa isang bagay na sa iba ay banal,
Kahit pa ma’t lahat ay may kalayaang
Ihayag kung ano ang kanyang pananaw
Ay maituturing na grabeng pagyurak
Sa isang relihiyon ang ipinta’t sukat
Ang isang sagradong bagay na di dapat
Gawing kakatwa sa paningin ng lahat.
Pagkat direkta nang pagtapak kumbaga
Sa isang kapuwa mananampalataya
Ang gawing abnormal sa mata ng iba
Ang may koneksyon sa kanilang pagsamba.
Na in-‘exhibit’ sa pambansang tanghalan
Ng sining at arte kamakailan lamang,
Nitong sinasabing grupo umano riyan
Ng sikat na pintor sa ‘ting kapuluan.
Na walang pangiming sinalaula nila
Ang sadradong bagay sa isang pagpipinta;
At kung saan ang Simbahang Katolika
Ang tuwiran nilang binaboy kumbaga.
Sa pangyayaring ang imahen ni Cristo
At iba pa, gaya ng Santa at Santo
Ay di lang binastos ng mga damuho’ng
Artists sa CCP sa ‘exhibits’ nito;
Kundi isang grabe rin namang pagtrato
Partikular na sa mga Katoliko,
Ang pinag-gagawa sa ‘exhibit’ na ito
Nina Mideo Cruz at kasama nito!
Na aywan kung anong sa ulo pumasok
At naisipan ang ganyang pambabastos
Sa kristiyanismo sa pagpinta kay Jesus
Sa paraang hindi ikapuring lubos
Nitong aywan natin kung matinong tao
O maluluwag ang kanilang turnilyo,
Kung kaya pati ang bagay na sagrado
Para sa kapwa ay kanilang niloko.
Eh kung sila kaya ang ipinta natin
Na may mga sungay, kagaya ng kambing
At saka may buntot na animo’y matsing
Matutuwa kaya ang anak ng teting?
Kaya kung ako ang siyang tatanungin,
Marapat lamang at matuwid marahil,
Na sila ay patiwarik na ibitin
Upang magtanda sa gawang di magaling
At kung maaari sila ay kasuhan
Ng ‘criminal charges for blasphemous art’ niyan,
Kasama pati ang CCP opisyal
Na nagpahintulot ng ganyang pagtatanghal.
Sa ating Pambansang Sentro ng Kultura
Na marapat mangalaga’t ipreserba
Ang sining sa paraang napakaganda,
At di sa ganitong pananalbahe na!
Nang di pamarisan itong si Mideo
Ng ibang kapwa niya may topak sa ulo,
Na posibleng kampon na rin ng demonyo
Kaya nagawa n’yan ang ganyan kay Cristo!
