Karas keng ganaka ampon kababan lub
Ala nang mibas pa mekad kening Piyuk,
Inya naman kening alang matiribus
A keyang esposa maglupa yang buguk.
Madalas pati na obra king kusina,
Ining Piyuk ya’ pa rugu ing gagawa;
Pero kaya e mu damdaman bitasa
Ing tumutul uli ning malam yang bina.
Pati na aliwang bage king bale ra
Kang Piyuk na pa yalig ning keyang asawa,
Nung inya marahil misan aisip na
Ing patasan ne’yti kabud kinatmu ya.
I Piyuk makanyan deng kalulunusan
Ding keyang kumpare at kakaluguran,
Inya naman iti tistus de nyang misan
A nung makananu ne ngarang pasdalan.
“Padre,” nganing metung, “malulunus kami
Keka nung inya mu asabi mi ngeni,
Ing sana e balang buri nang Kumare,
Pamintuan mu ba’yang e maglumo iti”
“O pare” ngana pang anting magparagas,
Makanyan pin inya e na ke madalas
Mipapate – kase itang e na kapad –
Ya ing gagawan ku at pamatad oras;
E na buri niti ing ya ing mamipi,
Inya aku na ing sisyasat, pipipi;
At king aliwa pang bage e na buri,
Aku naman pati pamanyese nasi;
Pero nung ngana mo kaibat kung memlantsa,
Aku pang mamipi pihu keng mikontra;
Uling e ku bisang mapasma, at saka
Lunto ing balamu ‘under’ ku pin kaya”!
Tutu pin naman eh, ninu pin namang
Lalaki ing basta mabisang utusan
Mamipi nung iti kaibat-na pang
Memlantsa, agyang nu’ anti kagalgawan?
(Panahun ning meging Piskal VIL M. DIZON
At ya ing Pamuntuk a makapanahun
Ning AGTACA inyang king misan ming pulung
Biklat na’yng bage bilang pamagpusung..
At aku kanita ing kwenta Kalihim
Keng AGTACA inya pati keng magazine
A ‘Good News,’ Mayap a Balita ngara pin,
akayabe kia mu naman i Tatang Vil.
A sobra ganaka, malugud makiabe
A pamisan-misan yagkat na ku bale
Nang santungan, kaibat yatad na kung pane
Keng terminal ding dyip a nu’ku sasake;
Pauli, nung inya matni kung asabi
Malam ya at iti e ya matapobre,
Inya aku angga king panahun a’yti
I Piskal VILLAMOR DIZON, Idol ke’ti!
