*
Ing imalang sukat dalan at ding maulagang bage, mituklip na at midatuk king maletang paldas kule. Manangis ya ing pusû mung ditakditak mamamate uling karas ning masala mamun naku king kekang bie.
**
Kapatda na ning dalumdum, king kayanakan ning abak, sulapo nakung paulî king labuad nung nu ku ibat. Ing kabud malakuan keka ing bakas na ning milabas, at ing kaplas a e tuki king malasak mung paninap.
***
Keti labuad da ring singkit at makibitis a sakang, balamu ing kapilan pa, mikit katang e sasarian. King metung a pamitupun da ring kabaleng mindayuan, mitagun ing kabud namû misiping kata luklukan.
****
Mekad pauli ning lungkut a maluat ku nang kasulu at king pamilyang milaut uli ning mangulila ku, kayabe ya karing sangkan ing manalipang leguan mu king pinandit murin ita dimdam kung sininta naku.
*****
Bistaman e ku piglingad ing kakung kabilian king bie ing atin nakung pamilya tinggap mu nang malumane. Kayagum ning inampang kung lugud king pusu memale kinaul mu neng mabilug ing pangatau kung tune.
******
Ibat kanita ing sablâ meging kule na ngan rosas King tula, ing pisulu ta, ala nang akatumbalas Ing sablâ binie mu kaku, lugud, rispetu at oras Pirayit me ing isip mu a ini e na magwakas.
*******
Masalusu lang minagus ding labing-metung a banua Panaun a king kakung bie iyang peka-maligaya E ku man nasang pupusan ing sayang aumpisan ta Dapot dinatang ing oras ban ing landas misagsag ya.
********
E mu sana pagkamalian ing e ku man manasakit Kalupa mu ing pusu ku manangis yang anggang binit Makanian man ding anak kung aldo’t bengi kukulayit Ing aduan dang muli naku e ku agiung ipagkait.
*********
Alang dapat parsalanan nung e ing maimut a palad Gewa na pang mikit kata king panaung e na sukat Tanam mu king kekang isip ing liguran da kang tapat Ala kung sisian ditak man kening bawal tang arapat.
**********
Potang lumual ku king pasbul ban e na magbalik sinta E mu naku sana atad at malaguâ meng isara Uling ustung asuglapan ku ing lua king kekang mata Pota e naku mitakbang at e naku milako pa.
Neng PL Rodel E. Gozum
