Ing maintun maliaring asawanan ngeni,
Alang sulit ditman, pekamayan dili;
Lalu na nung atin kang perang sarili,
Agawa mu ing kasal a peka-engrandi.
Makapamili kang mangatas a tau
A maging tegawan ampo pang damas yu;
At agiang ing kasal gawan yu pa Tokyo
Alang sulit ditman, mayan agawa mu.
Pelalu kalagu at kaseksing bebung
Makakua ka uli ring bitbit mung datung;
E na kalupa niang minunang panaun
A medyu masulit bagia ing manintun.
Makanian kalagua ing pamakiasawa
Agiang e ka sapat a pera king bulsa,
Pablasang nung misan, ing babai ya pa
Ing babie pang-gastus ikasal dia sana.
Pero bukud pa king akabislak pusu,
Keng pamangatuangan, eka bisu-bisu;
Uling nung mitud ka king masungit rugu
Mamusan kang krus a e pabiru-biru.
Inia nung atin kang balak a ikasal,
Abe e ka rugu binang mamirapal;
Ala nang muna keng dagdag kaingatan
Anti na ning e mu asawa’ing paytunan,
Ulining mayapang e ka kanud tinud
Matinung asawa king bie akalukup,
Maliaring ligaya ka ngara pin kabud
E mu king marok a katuangan ka mitud.
At saka nung tiktak ya pa kapakialam
Anti ka mo waring meimpyernu bilang
Pablasang ninu mang e tumud katuangan,
Keti pa king yatu, meimpyernu ne yan!
Pablasang ngara pin ing pamakiasawa,
Mas masulit pa ing managtal saresa;
Kase uli na ning makatalanga ka,
Magkang makaralpak kang bage matsura.
At saka balamu pialung nang mistula
Ing ngeni ngara a mi-usung bigla,
Atlu la pang aldo miabe ring aliwa
Mikawani na la – ay sobra kalagua!
E anti ing napun ngara ping sasabi
Ding makatua a nu’ bugbug ne’ing babai,
Keng tumbuk at sipa e kawani iti;
Makanian kanita ketang panahun mi.
(Sobra king karagul ing pamialiwa
Ning napun at ngeni nang Sisa at Tekla,
A binang masulit nang ibalik yata
Ngening panahun da ring Tomboy at Bakla)!
