o ba’t lelangan pa, keti babo yatu
nung e man maglambat, pangisnawa tamu
nanu man ing sangkan, ini e tamu balu
ali alang angga, bie mu bilang tau
misteryu na ning bie, marakal takbangan
sanang matibe la, tatalnang guyabnan
e ka mamalagwa, dapat mung tandanan
nung e ka mapile, e makalakad man
mibait ka pin sa, kabud ka mu tau
tajimik kabilyan, pamilyang lukub mu
dakal nang delanan, maski ukdu ukdu
ating kasakitan, atin nang delubyu
iti ba’t mibait, pyalungan turing ba
atin nang ikwerdas, pusu mu at diwa
anya e milalako, kutang alang patna
keyang metung kumpas, bigla kang mawala
nukarin no reta, a menga-minuna
matua nang panaun, king bilang ning banua
dinat la king gabun, at ating ulaga
nung isulat deng lagyu, magkulang ka tinta
pasalamat na mu, linto king masala
delang kasakitan, atin muring saya
kesang e pa bait, maluat manenaya
kapilan nung datang, D’yos mu ing mitakda
sana nung misapuak ka, e mu meging tau
ating pakinabang, keti babo yatu
lalu nung ‘lang dungis, atin kang prinsipyu
ing bie mu tune pin, payapa’t progresu
tyu keyang upaya, kapilan ka kunan
lelangan nang tau, king babo sikluban
‘ting mibabait pa, ni e miglambat man
ing bayung menganak, abeng siyam a bulan
atin nang matua na, masakit lalakad
bisa nang paynawa, e mapatad patad
kaburyan ning Guinu, e ta awawatas
kutang e mapupus, ‘yang makapakibat.
