(Antining dakal la ring talapamasa
a mamitang pasibayung makabasa
karing sinulat ding aliwang makudta
a’yanti’y Canuto Tolentino, ya pa –
Ning balen Minalin at saka ning San Luis
umpisa king aldo na ngeni ning Lunes,
ing kakung ipalual a bilang pamalit
karing kaku – a pang-laureadu pangulis.
Iti, pemansagan neng ing “ILANG-ILANG”
a makapatunkul kang M.C. nang Hirang,
at antia kanini panga-balangkas yan
agpang king paniulat ning poetang sakdal):
KILUB ning mula mi migmain ku misan
mipatalanga ku kening Ilang-Ilang;
king likut ku gamat kaku yang inagtal
ing metung karetang sampaga nang dakal.
Kaybat kung binau ing bangle nang tagle,
dela kung inuli kilub na ning bale,
king metung a kaun karin ke linele
kanita malwat na – Akalingwan ku ne
Kaybat ning mapilan panaun kanita,
itang Ilang-Ilang akalutkut ku ya;
mipamulala ku king ikit ding mata,
lakwas yang mebanglu melanging sampaga.
Kalupa me Mutya itang Ilang-Ilang
inyang kening bie ku ika ing dinatang,
pamikilala ta’ kanakung gilutan,
dapot lulwat lalu ra kang panintunan.
Adwang mikalugud nung mikandayu la,
lungkut ya ing metung, ing metung sabik ya;
anting Ilang-Ilang ing karelang Sinta,
lulwat lalung lalkas ing tagle banglu ra.
San Luis, Pampanga.
