Ibat ketang anak ku pa pane ku nong daramdaman
Magsalitang atmung lugud king amanu tamung siswan,
King lindayug daring bersu ding karelang kasulatan
Maka-duyan ka mo wari nung keka pakatingiran;
Inya ibat na kanita tenam ku king kaisipan
Potang aku na ing dagul, ing bakas da kakung tukyan.
Inya ngening meragul ku at miganap a pamisip
Agyu ku nang pitimbangan sablang bage keti sulip,
Akakit ku’t daramdaman yang gugulu kening isip
Ding aliwang magsalitang king amanu bisang sagip,
Ila mismung dadakurak makamate anting lasip
King karelang panugali a kanakung asisilip.
Atin ku ring apansinan kukulait magsalita
Ing lugud na king amanu ngana niti alang kadwa,
Sumangid ning sasabyan na kaya e na pamu bala
Ing salitang kapampangan agyang ya pang masalaula
Mika’laman ya sa bulsa karing kwaltang makaguna
Keti babo na ning yatu, kalingwa’nang sabla-sabla.
Detang bayung talasulat nung akit mo kasulatan
Ing karelang pama’muna ‘la na waring kapupusan,
E sa bala, nung ing puna a babye ra at gagawan
Para ketang panyulung na ning karelang pupunahan,
Dapot ali… king dapat da kulang namu e ra sabyan
Itang manang pamanyulat lakwan tana na at kalingwan.
Ding aliwa ing dapat da anti ro pang pisasabung
Kalupa rang talasulat ketang sitsit ampon bulung,
King makanyan a dapat da makananu yang sumulung
Ing amanung pagnasan dang mamulaklak at lumabung,
Kabang o yan ila mismu tutulak de at susubung
King saug na ning kabigwan, babaldug de ketang aun.
King palsintan tang amanu para kaku, ing malugud
Tipunan dong kayabe ra balang mikakalugud,
Pisan-metung deng sagipan karen nung ting malulumud
Nung anti yang miraragsa ilang magsilbing patukud
Alang milub a manyira, uling matibe lang bakud
Ero kabas detang tatyo, kanya-kanyang pamagbukud.
Ing amanung kemulat na lalu na neng e pisali
Agyang kaya ro pa ibye detang dakal a salapi,
Bista’man ing kakalulwan kakambal ning kayang bili
Iti ene ipaglibe agyang dunutan deng malati,
Angga man king kamatayan kaula’ne at ituki
Ing salitang ligura’na at ing palsinta’nang lahi.
Karing kayang kasulatan agyaga’nong kayanakan
Ban sumese at palabung king amanu tamung siswan,
Usuka’no ketang mayap at yapse na ing katutwan
A mimiral keting yatu lalu na pin ing kayapann,
Ninu yaman ing tutuntun king bukut at lisyang dalan
Tayira’ne at ituki king landas ning katuliran.
Kakilala’t kaluguran nung atin lang pamipate
Libutad yang mamilatan sabya’na ing masalese,
Itang ustu yang kampya’na kanita lalung tumibe
Detang taung makatangal ing kaya ra panlalawe,
Inya naman ngening oras makanyan kung kaya babye
Ing kanakung panalala at tapat a pamamuge.
Pakinabang ding memalen yang pane nang isusulat
Ing kayapan at ing marok yang pane nang imumulat,
Nung ating magsamantala saga’na nong alang gulat
Yang sandatang gamita’na ing taram na ning panyulat,
Makanyan deng panginlagan ding ating marok a dapat
Uling kabud abalu na king balen na isambulat.
Yang bante da ring memalen karing atyu king gubyernu
King ba ralang ababalu ding darapat king e ustu,
Detang daywan a manyakup nung luban deng balen tamu
Mumuna yang maghimagsik lumaban yang siguradu,
Agyaga’no ring memalen laban karing manabusu
Para kaku makanyan ya… ING MALUGUD KING AMANU.
Dolly Gigante Ferrer
Barangay Anunas,
Angeles City, Pampanga
