Misan ating atlung anak a merakap
Kilub ning palengki, menako lang prutas;
King ba’lang mabandal king sala rang depat
Den king munisipyu da la delang agad.
At karas da reti king istasyun pulis
Disan de ing Hepi a sobra a kabagsik;
“Nanung kasu da ren” nganang migaligit,
Pekibat ding tanud” menako la pu Tsip”.
Kaibat ning balamu seryosung penyabi,
Inaus neng agad ing kayang Deputy;
Tukyan yo’ ren ngana kilub king palengki
At ding penako ra dala yu la keni.
Ing minunang misyang karing atlung anak,
Ya’ytang ing penako niti sinigwelas;
At ngana ning Hepi, “ban agad milabas
Ing kekang salol ing muna mung ilukas”
At kuma ka nganang metung a pirasu
Karen a ngamu king palengki kinwa mu;
King kekang pitaklan ipalub meng todu,
Absweltu na ka king kekang meging kasu.
Kabang papalub ne yan king kayang buldit,
Ining miparusan maybug neng manangis;
Mipawas ya kanwan at mangapangisngis
King penandaman nang e bibirung sakit.
Kaibat mipatupad ing meging parusa
Pepaulyan na ne ning Hepi karela;
Kalwal na king pasbul nitang opisina
Atyu na la naman detang kayabe na.
Ing kaduang kareti ya namang meyaus
King kuartu ning Hepi malagwang linub;
Timpak ne lamesa darala nang suput
At magugumasid karing pakalukluk.
“Nanu la klasi ring prutas mung darala?”
Ngana niting Hepi a mengutang kaya,
“Santul la pu” nganing agad pekibat na;
“Aru!” nganing Hepi, “karagul da pala?”
Nung makanian abe daklut na kang metung
Karing amanwan mung penako mung santul,
Ilukas mu ne ing kekang kortung mahung
Ba’na kang milabas king ibie kung atul.
“Nanu pung gawan ku?” ing agad nang kitang
“Kanining santul a kanakung tatalnan?”
“Ipalub me” ngana, “king kekang pitaklan
Ing metung kareti bilang kaparusan”
Anyang idampi ne king kayang kuyukut
Ban king pitaklan na ume nang ipalub,
Sinagakgak ya pa’t saka atuk-atuk
Mayling anti waring e maybug mapupus.
“Nanu ing kaylian mu?” nganing Hepi kaya,
“Obat balamu yang makaloko keka?
Ing abe mung metung a kakung perusa
Maybug yang mabungsul at digsu merusmya.
Samantalang ika akakwa mung mayli
Kening kaparusan a keka ibye mi?”
“O makananu pu”, pekibat na niti
“Aganaka ke pu ing abe ming tawli”
“At bakit naman mo yang kekang isipan
Samantalang ika ing keni makasyang?,
Sarili mu namu ing kekang ganakan”
Nganing Hepi kening makasyang parusan.
“O makananu po” nganang migmatulid,
“Talagang e ku pin pu lubus aisip
Nung makananu neng isaksak king buldit
Itang penako nang langkang Catanduanis!!”
Vhelle V. Garcia
Abu Dhabi, United Emirates
