Madalas, abe reng sisimba i Pisuk
Di Atsi na, ken king bisitas Tulauc;
Babasan na la ring makasulat kilub
Dane na ning ating makapaku king krus.
At king sarili nang bubut a pamisip
Kukutang na niti ing sangkan nung bakit
Dane wanan nang ‘Christ’ karin dala kebit
Ding makasulat a letrang makalukib.
Inya makanyan nang aisip ikutang
Kang Atsi na, oneng e ne pakibatan,
Nu’ne ngana kaya “Ima’ing kekang kutnan
King ba’mong abalu tune kabaldugan.
E na ne kitnan pang pasibayung Pisuk
I Atsi na uli ning madalas malaut
Ing pakibat niti a lulwal king asbuk,
Nung inya king Ima ya migmasikan lub.
“Ima, obat ating ‘Ten Commandments’ ngara?
“Anak, apulu lang utus ning Dios deta,
A sukat igalang at pamintuan” ngana,
“Ban milisya tamu king pamikasala.
Ing Ginung Miglalang o Mayupayang Dios
Yang minye kareti ping ‘Apulung Utus’
Inya ren dapat lang mipamintuan lubus
Ban e ta’ manabu kanu king Impyernus”.
“Nung makanyan Ima, mas dakal lang keka
Kesa king Dios” uling apulu lang Kaya;
Ding keka, a kaku pane yutus keta
Umpisa king abak – den katalaksan la!
Kagising ku “Anak sali ka pang kape,
Mayumu, gatas, pamalaman tinape;
Sabun kaibat mengan, at bayu mo’ ibie
Reng bakal ku palub king eskwela pane.
Kaibat kung megaral, makanian na naman
Utus karin at ken, asna king karakal;
Nung e ku tatakut masaplid siklangan,
Madalas, e ku na buri mang pamintuan.
Kasi pin, ding keng Dios apulu la kabud
Kabang ding kang Ima alang patna alus;
Mipaynawa kumu dusildit keng utus
Potang Ima ku pin maniaman ne tudtud!
(Inia nung isipan banayad, obat pin
Apulu lang utus ning Dios, dakal la ring
Ken e mamintu at dirinan dang pansin
Ing malating bage kailangang alarin;
Nung nu’ ring dakal ken, ing mas deting kapad
Magbabad king bisyo, kesa dinan oras
Ing para king Dios at idake ditak
Ding apulung utus a e matutupad!
