Diether Ocampo di na sanay sa presscon

Naniwala kami kay Diether Ocampo na hindi na siya sanay dumalo sa presscon at humarap sa press dahil sa presscon ng Season 5 ng Wattpad Presents, habang nasa presidential table siya kasama ang ibang cast, madalas siyang nakatungo at hindi tumitingin sa press people at photographers.

“Hindi na ako sanay magpresscon, naninibago ako. Two and a half years akong hindi umaarte.

Magbabalik na sana ako sa teleserye ng ABS-CBN, hindi lang natuloy dahil nagbuntis si Judy Ann (Santos).

“Kaya sobra akong grateful sa TV5 at kay Ms. Wilma Galvante for the opportunityto work with some actors na hindi ko pa nakakatrabaho. First time ko rin to work with direk Phillip Lazaro. This is a good opportunity for me at ’di ko palalagpasin,” paliwanag ni Diether.

Sa ABS-CBN pa rin si Diether pero, nag-guest muna sa TV5. Tampok siya sa Wicked Ways episode ng Wattpad Presents, airing starting this Monday up to November 27, 9 p.m., with Ritz Azul at John James Uy. Sila ni Sam Pinto ang magkasama sa Seducing Mr. Wong episode, airing on December 14-18.