(Karugtong ng sinundang isyu)
ITONG daigdig ng katawagan mandin
Ay paraiso ng mga sinungaling,
Kung kaya’t sa isang slot, minsan anim
Ang nag-aagawan – at di maaaring
Dalawa partido lang ang maglalaban
Para makahabol yan ng sabay-sabay;
Kaya suma total sa puntong naturan
Bagong political party ang kailangan.
Na di magtatagal ay kusang kukupas
Din naman ang taglay na ningning sa lahat,
Gaya nga ng KAMPI r’yan na itinatag
Noong panahon pa nitong nakalipas.
Na Adminstrasyon – na ngayo’y patay na
Ang partidong itinayo ni Mam Gloria,
Pati na rin dito mismo sa Pampanga,
Na itinuturing nitong home province niya.
At maging si EdPam na Kalihim noon
Sa ‘external affairs’ ng Administrasyon
Ng dating Pangulo ay sinabi nitong
Ang Kampi’y wala nang magiging ‘major role’
Comes year 2013 or next year’s election
Pagkat ‘dormant’ yan ng mahabang panahon,
Although it was revived in year 2004
Ng ating Kabalen na ngayon ay Solon.
At pati na rin ang political parties
Na tinukoy natin di na rin lalawig
Ang pananatiling buhay sa daigdig
Nitong pulitika sa puntong nabanggit
Dahilan na rin sa sobrang dami nito
Ay di na nga natin matiyak kung sino
Sa bumubuo n’yan itong may talino
At sadyang marapat maluklok sa puesto.
Sanhi na rin nitong sa sobrang dami n’yan
Ay tunay naman ding nakakalito lang,
Sa mga botante ang pagpili minsan
Kung sino nga kaya ang maaasahan.
At laang maglingkod talaga ng tapat
Sa Inangbayan at kanyang komunidad,
Ng walang anumang personal na hangad
Kundi makatulong sa lahat ng oras.
At ng serbisyong maipagkakapuri
Ng mga Kabalen at kanyang sarili,
Na di kagaya ng mas nakararami
Nating pulitikong wala namang silbi.
Kung saan ang iba nito ay produkto
Ng kung anu-anong binuong partido,
Nitong aywan lang kung tunay na serbisyo
Ang pakay kung kaya kumakandidato.
Pero kung tayo po itong tatanungin,
Ay makabubuting ibalik sa dating
Dalawang partido na lang itong ating
Sa election palagi nang gagamitin.
Pagkat gaya nga po ng ating nasabi,
Nakalilito lang kapagka’ marami;
Sanhi na rin nitong ang iba nga kasi
Palipat-lipat lang o hindi mapirmi
Ng kanilang kampong kinaaaniban
Tuwing nalalapit na r’yan ang halalan,
Kung kaya pati ang mga manghahalal
Ay kung sino na lang ang naihahalal!
