PANG-‘BELIEVE It or Not’ na ni Mr. Ripley
itong dito ngayon sa’tin nangyayari,
kung saan di lang sa hanay ng PNP
ang sangkot sa isyung gawang di mabuti
Kundi pati na rin ang ilang tauhan
ng ating NBI, na tila direktang
may partisipasyon sa ‘kidnap for ransom’
sa isang negosyanteng Korean national
Na dinukot mula sa Angeles city
at pagkatapos ay diyan sa Camp Crame
dinala mismo ng pulis na nasabi
at pansamantalang dito dinetine
Subalit sa hindi malinaw na ulat
at/o pangyayari na ating nakalap,
nitong bandang huli na lamang lumabas
sa ‘news report’ itong iba pang naganap
Na binigay na nga ang kanilang hiling
sa kapamilya n’yan pero pinatay din
ng isang SPO 3 Sta. Isabel,
(na napabalitang pinaka-‘mastermind’)
Ng nasabing mga alagad ng batas,
na sila ang sukat mangalaga dapat
sa konstitusyon ng Inang Pilipinas
pero sila itong unang lumalabag
Pagdating sa puntong ang takbo ng isip
ay pangsarili ang lubos nananaig,
kaya’t ang hantungan ay di sa matuwid,
kundi sa masama’t di kanais-nais
At sa maka-hayop na kaisipan din
laging nakatutok ang puso’t damdamin,
kung saan ang tuksong di kayang pigilin
ang namamayani anhin mang supilin.
Kasi ang anumang nakasayan na
ng kahit sinuman ay di na n’yan basta
makayang kontrolin ang sarili niya
lalo’t pagdating sa alindog ng pera.
Kung saan pati ang may kwarta na’t lahat
ay nagagawa pa nilang mangulimbat
sa kaban ng bayan sa paraang sikwat
sukdang ang dangal ay mabaon sa lusak.
Kaya naman dala na rin kadalasan
nitong ang dulot n’yan ay kapangyarihan,
di na kakaunti ang nagnasang yumaman
sa kahit na anong klase ng paraan
Gaya na lang nitong ating ‘subject’ ngayon
na hayan, kundi man lahat nakakulong
pero saan sa akala kaya n’yan hahantong
ang kanilang kaso na ‘kidnap for ransom?’
Ipagpalagay ng lahat ay absuwelto
(dahil magaling ang mga abogado
na makukuha r’yan ng mga damuho)
pero saan pa yan posibleng patungo
Kundi sa kawalan ng pagkakitaan
o ng disenteng trabahong mapasukan,
pagkat ang magkarun ng kasong tulad n’yan
ay tunay naman ding pinangingilagan.
Kaya saan pa yan posibleng pulutin
kundi sa ika nga ay sa kangkungan din
hanggang sa tuluyang mabuwal sa dilim
kung walang magkusang sila ay sagipin?!
