BILANG INDU na ning mal tang’ lalawigan,
y Gob ‘Nanay Baby,’ keyang katungkulan
ing munye suporta’t saup a kailangan
ding memalen laban king panulung bawal.
Inya ing PDEA, karing pitung milyun
a ibat kang ‘Nanay’ para keng konstruksyon
ning Regional Offi ce na king Sentral Luzon,
mekasaup king karelang operasyon
Laban karing pushers at users ning shabu
at pangatuklas ken ding laboratoryu
ning mesabing bage magdalang peligru
king kapaldanan ding kaprobinsya tamu.
Karing kapulisan makanian mu naman
ing suportang ibat king gamat nang ‘Nanay’
ban ing nanu pa mang bage a iligal
a mitsa ning krimen agad miyangganan.
Inya nung ngara ken ding keng social media,
pane mag-‘post’ king y Gobernador Pineda
‘Is doing nothing’ o ali ya magobra
asabi kung e ra balu’ing sasabian da.
Kasi keng karakal na pin gagampanan
ampon aliwa pa a sukat lingunan,
e na’na personal akwang panimunan
ing operasyun keng bage anti kanyan.
Nung inya ing ngana, iti obra da na
ding PNP tamu at ding keng PDEA,
atyu keng matulid ing Gobernadora
uling ilang dapat sumiasat talaga
At manintun kareting pakasalikut
a laboratoryu karing makalaut
keng kabalenan at e na basta kabud
malaguang akit nung e ka masalugsug.
Makanian man, y Gob, maigpit nang bilin
karing sablang mayors, BFP personnel,
municipal police, licensing offi cers,
ing mapagmasid kareng private properties;
Lalu’t karing medyu mangatas a bakud
A pabrikang pamangan babi o manuk,
(Antimo ing karin Magalang, at Lacquios
ning balen Arayat, keng tibis ning bunduk).
Male tamu, e mu ring laboratoryu
a metukal a ren ding atyu keng baryu
at karing karatig deting munisipyu
ding aduang balen a kerakpanan shabu?
A e mu pin kabud ‘sachet’ kalulanan
nu’ne mekad libung kilu nung timbangan
ing bawal a drogang ikua rang asamsam
ding otoridad a migsiasat king lugal.
Subali king Siyudad na ning San Fernando
ampo ning Angeles atin pa siguru
karing urban areas ning Pampanga mismu
ing posibleng ating pipagawan shabu.
King Guagua, Sasmuan, Porac, Sta. Rita,
Lubao, Macabebe, Masantol, Candaba,
San Luis, Sta. Ana, Mexico at saka
San Simon, Apalit at Floridablanca
Antimurin Bacolor at Sto. Tomas,
at Minalin, male tamu atin mekad
a kalupa reting ikua rang atuklas
ding kekatang masipag a otoridad.
At antining buri ta’ya ping linisan
ing probinsya laban keng panulung bawal,
Ika, aku, bilang tune Kapampangan
Misaup-saup tang’ guniat at makialam!
