LUNGSOD NG BALANGA — Isang sanggol ang kabilang sa 24 na bagong nakarekober sa coronavirus disease na ang bilang ay umabot na sa 2,221, sabi ni Gov. Albert Garcia nitong Huwebes.
Ang sanggol ay 1-buwang gulang na lalaki mula sa Orion. Bukod sa kanya, bagong gumaling din ang isang 5-taong gulang na babae na mula rin sa Orion.
Kabilang sila sa mga nakarekober na ang pito ay mula sa Orion, anim sa Mariveles, tatlo sa Hermosa, tig-dadalawa sa Balanga City, Orani at Morong, at tig-iisa sa Pilar at Abucay.
Samantala, umakyat sa 2,574 ang kumpirmadong kaso ng Covid–19 nang magtala ng 15 bagong nagpositibona ang anim ay mula sa Orani, tatlo sa Mariveles, at tig-dadalawa mula sa Pilar, Limay at Balanga City.
Ang bilang ng mga aktibong kaso o mga hindi pa gumagaling ay 305 na ang sabi ng provincial health office ay naka-isolate. May 48 ang nasawi na.
Mula sa 24,899 na sumailalim sa Covid–19 test, 21,994 ang nagnegatibo at 331 ang naghihintay ng resulta.
