LUNGSOD NG BALANGA — Sa ulat ng provincial health office Huwebes ng hapon, 11 ang naitalang bagong nakarekober sa coronavirus disease sa Bataan.
Ang mga bagong gumaling sa nakamamatay na virus ay: 23–anyos na babae mula sa Balanga, 39–anyos na babae mula sa Dinalupihan, dalawang tig-33–anyos na lalaki mula sa Orion, at 34–anyos na babae, dalawang 29–anyos na babae, 30–anyos na babae, 24–anyos na babae at 32–anyos na babae lahat mula sa Mariveles.
Isa pa sa mga gumaling ang inaalam pa ang kasarian, edad, at kung tagasaan.
Sa kabuuan, 152 ang bilang ng mga nakarekober na habang ang active cases ay anim at 10 ang pumanaw na.
Nasa 185 ang naghihintay ng resulta ng test, 3,107 ang nagnegatibo na at 83 ang mga bagong na–test.
Mula noong ika-31 ng Enero hanggang sa kasalukuyan ay 3,460 na ang na–test sa lalawigan.
Samantala, may isang bagong kumpirmadong kaso ng Covid-19.
“Siya ay 42-anyos na lalaki mula sa Abucay at isang overseas Filipino worker kaya 168 na ang kabuuang confirmed covid cases,” sabi ng PHO.
