sa pagtakbo ‘for the forthcoming election’
ang ‘grounds’ para sa mga kandidatong
di pa man ay labag na sa regulasyon
Ng COMELEC itong ginagawa nila
gaya na lang nitong di pa man talaga
‘campaign period’ pero halos ang lahat na
ay lantaran na riyang nakapangampanya.
Na di man tuwirang masasabi nating
ito’y isang uri ng ‘electioneering,’
pero di ba’t paglabag nang maituturing
yan sa Omnibus Code ng eleksyon natin?
Kaya kung susundin ang mga marapat
na aksyong kailangang lubos maipatupad,
magmula ibaba hanggang sa itaas
masasabi nating ‘disqualified’ lahat.
At kung mayroon mang di pa nagparamdam
(na ya’y kandidato) sa pamamagitan
ng campaign posters at kung anu-ano pang
nangakasabit na sa hayag na lugar
Ay baka wala pa sa singko porsyento
sa kabuoan ng bilang ng tatakbo
para sa eleksyon sa buwan ng Mayo
ang di pa naglagay r’yan ng kahit ano.
Kaso, ito namang marapat kumilos
para ipatupad ang dapat masunod,
Hayan – kampante lang sa pagkakaluklok
kundi man talagang ya’y tutulog-tulog
Na kagaya nga riyan ng ating Komisyon
sa Halalan, na siyang marapat umaksyon
ngunit nang dahil sa yan ay usad-pagong,
palaging huli kung sila’y magdesisyon.
At kung saan kailan puno na ang EDSA
sa ubod dami ng mga nagsabit na
posters at ibang campaign paraphernalia,
saka iniutos na tanggalin anila!
Hindi ba malaking katarantaduhan
o ng ika nga’y grabeng kapalpakan
ang pinagagawa ng Comelec na yan
kung pakaisipin sa puntong naturan?
Kaya bunsod nito, kung kailan puno na
ng campaign posters ang puno ng akasya,
kable ng kuryente, bakod ng eskwela
at iba pa saka lang kumilos sila.
At ipinag-utos na yan ay tanggalin
kung kailan pati ang ‘starts of the campaign
period’ para sa pang-nasyonal mandin,
‘shall commence on February 9, 2016’.
(At ang lokal ay sa March 26 naman
kung kaya’t malinaw na kapabayaan
ng ating COMELEC ang lahat ng bagay
na nangyayari riyan sa kasalukuyan).
Kung saan ang local government ang tiyak
na mapipilitang iligpit ang kalat,
gayong COMELEC ang magpalinis dapat
pagkat sila itong pabaya at lahat.
Dahil sanhi na rin ng kapalpakan niyan
at pagiging bulag sa gampaning legal,
Ang hindi matuwid ang nakasanayan
at di itong batas na dapat umiral!
