burakang bitis, tau lang kilwal
bansag karela, ‘tin lang pagnasan
idelohiya, ibat keng daywan
turu ng Tsetung, Che na ning Cuban
Karl Max at Lenin, a menimuna
Aliwang bangsa, lalu king Rusya
Ka Luis Taruc, a sosyalista
King Pilipinas, yane karela
ibat ning gyera, karetang sakang
deng Hukbalahap, ‘li la tinuknang
e pa meyari, kareng isipan
ating kinuldas, ‘tin pang linaban
bayu ing laban, bayu ing lagyu
meging Kumander, ilang kinatmu
aus dang HMB, ilang pinunu
meging husgado, king balang baryu
Ka Luis Taruc, siku ing baril
menajimik pa, migsilbi parin
e na kelingwan, lugud mibitin
gamit ing pluma, boses matarling
kaibat na niti, ining NPA
Kumander Dante, likluk deng lider
pibatang HMB, likwat pebusten
ing para kaya, sesen ing balen
e man migluat, iya merakap
panaun ng Marcos, kilung malambat
nune kang Cory, na taga Tarlac
dakal lang gamat, tinggal no posas
buring ibalik, akung aranas
kekaming balen, kanita tanyag
patse sisilim, metung lang iskwad
adyang pamangan, maputing ulas
deng kadreng pili, ilang lalapitan
nung ‘ting sigalut, mie kalutasan
pilan mung aldo, ‘ting mamilatan
aduang mikontra, akit ing timan
e ka magsuplung, kareting pulis
eka maglambat, bangkeng mibalik
‘ting kasapakat, pane magmasid
anya ing takut, e mu apalis
deng manungkulan, talnan do batal
manyad lang pondo, alang salangsang
yang negosyante, sobre ing duduang
taung makwalta, e bisang sugal
alang progresu, pag ating ane
ing prinsipyu da, dapat idake
malating puling, balag king adle
e mu alisyan, ni asalese
meging biktima, kanakung koya
tau lang kilwal, pitdan inawa
tagal ‘sang muli, tuking kumpanya
balu da kasi, e de adikta
meyor kanita, tatalang baril
keng enteblado, mibulang tambing
ala mu kaya, ketang salarin
Pulis king kilwal, tatakut murin
dakal nong tau, tinulung daya
sasalikut da la, e babalita
akit mu lamu, e akikilala
gatio gato la, ilug Pampanga
ngening panaun, pamagprotesta
kareng eskwela, pati kalsada
yang idelohiyat, pakikibaka
tatalang baril, mengatabi na.
